Bjarni Benediktsson, utanríkisráðherra og fyrrverandi fjármálaráðherra, mætti á fund stjórnskipunar- og eftirlitsnefndar Alþingis í morgun. Tilefnið var yfirferð á áliti umboðsmanns Alþingis um Íslandsbankasöluna. RÚV greinir frá.

Í áliti sínu frá því síðasta haust komst umboðsmaður Alþingis að þeirri niðurstöðu að Bjarna hafi skort hæfi þegar hann samþykkti tillögu Bankasýslunnar um Íslandsbankasöluna. Þessi niðurstaða leiddi til þess að Bjarni sagði af sér sem fjármálaráðherra og flutti yfir í utanríkisráðuneytið.

RÚV greinir frá því að Bjarni hafi verið ósáttur við fundinn og spurningar sumra þingmanna. Hann sagði: „Hvers konar fundur er að eiga sér hér stað? Mér heyrist að hér sé í uppsiglingu einhvers konar pólitískur fundur sem á að nýtast til þess að veltast upp úr löngu liðnum hlutum sem ég hef nú þegar axlað ábyrgð á.“

Þórhildur Sunna Ævarsdóttir, þingmaður Pírata, svaraði þá: „Þetta er þingnefnd. Við erum í pólitík.“

Þórhildur tjáir RÚV að engin gagnleg svör hafi komið fram á fundinum:

„Ég fékk engin efnisleg svör. Ég fékk aðallega enn einn skollaleikinn og núna er þingið aftur orðið sökudólgurinn. Ráðherra axlar í raun enga ábyrgð.“

Bjarni segir fundinn hafa verið sérkennilegan, sem og tilefni hans:

„Þetta var hálfsérstakt allt saman, að nefndin vilji kalla hingað fyrrverandi ráðherra eftir að hafa ekki einu sinni fengið umboðsmann Alþingis á sinn fund til að fara yfir hans álit og reifa þessi helstu sjónarmið sem eru að takast á áður en menn leiða fram einhverja lögfræðilega niðurstöðu um flókin álitamál.“