Orðið á götunni er að birtingarmyndir verðbólgunnar séu margs konar. Það er dýrara í strætó og sund en var í fyrra. Matur og húsnæði hækkar frá mánuði til mánaðar. Hvert sem litið er blasir við að okurvaxtastefna Seðlabankans hefur siglt í strand.

Tekjublað Frjálsrar verslunar kom út í vikunni með upplýsingum um tekjur um fjögur þúsund Íslendinga. Tekjublaðið kemur út á hverju ári í sömu viku og skattskráin er opinberuð.

Orðið á götunni er að mörgum hafi brugðið í brún er þeir sáu verðmiðann á blaðinu í ár, en það kostar núna kr. 3.490. Á síðasta ári kostaði þetta sama blað kr. 2.990 og hefur því verðið hækkað um 17 prósent milli ára. Almennt verðlag hefur hins vegar ekki hækkað um nema ríflega sex prósent. Raunhækkunin á Frjálsri verslun er því um 10 prósent

Árið 2022 kostaði Tekjublað Frjálsrar verslunar kr. 2.790 þannig að hækkunin á tveimur árum nemur 25 prósentum, sem er langt umfram verðbólgu í landinu á sama tímabili.

Útgefandi Frjálsrar verslunar er útgáfufélagið Myllusetur, sem einnig gefur út Fiskifréttir og Viðskiptablaðið. Orðið á götunni er að verðhækkun tekjublaðsins, langt umfram verðbólgu, teljist fremur dapurt framlag í baráttunni við verðbólguna frá útgáfufélagi sem predikar aðhald og ráðdeild í rekstri einkaaðila og hins opinbera í sínum miðlum.