Brynjar Níelsson samfélagsrýnir hæðist að Dóru Björt Guðjónsdóttur, formanni umhverfis- og skipulagsráðs Reykjavíkurborgar og segir hana aðeins kunna þrjú orð.

,,Oft getur verið snúið fyrir borgarstjórann og meirihlutann í borginni að svara fyrir verk sín og verkleysið. Það vefst þó ekki fyrir formanni umhverfis-og skipulagsráðs borgarinnar. Hún hefur lært þrjú orð, sem eru falsfréttir, upplýsingaóreiða og misskilningur, og notar þau sitt á hvað þegar allt er í óefni og lítið um svör,“ 

segir Brynjar.

Rifjar hann upp snjómokstur, tré í Öskjuhlíð og lóðaúthlutun. 

,,Það var misskilningur að eitthvað væri ábótavant í snjómokstri borgarinnar. Það bara snjóaði meiri en við mátti búast. Sennilega er það misskilningur hjá Ísavía að trén í Öskjuhlíðinni séu of há fyrir blindflug og uplýsingaóreiða að borgin þurfi að fara að loftferðalögum. Upplýsingaóreiða hjá Samtökum iðnaðarins að borgin stæði sig ekki í lóðaúthlutun og uppbyggingu íbúðahúsnæðis. Mátti skilja formanninn að hvergi væri meiri uppbygging þótt nánast engin íbúð væri tilbúin. Gagnrýni á gjafagjörning Reykjavíkurborgar til RÚV og olíufélaganna var blanda af falsfréttum, upplýsingaóreiðu og misskilningi.

Það er listgrein að geta blaðrað endalaust og skilja borgarbúa eftir engu nær um í hverju falsfréttirnar, upplysingaóreiðan og misskilningurinn felast. Mætti halda að formaður umhverfis-og skipulagsráðs borgarinnar væri Pírati.“