Harpa hefur getið sér slíkt orð fyrir hljómburð á heimsmælikvarða að allar bestu hljómsveitir heims og tónlistarflytjendur vilja koma hingað og halda tónleika í Hörpu. Tónlistarheimurinn er lítill og orðsporið skiptir öllu máli. Svanhildur Konráðsdóttir, forstjóri Hörpu, segir ekki hægt að þakka það nógsamlega hve mikil fyrirhyggja og ástríða var lögð í að Harpa væri frábærlega vel úr garði gerð alveg frá upphafi. Svanhildur er gestur Ólafs Arnarsonar í Markaðnum á Eyjunni.

Markadurinn - Svanhildur Konradsdottir - 2.mp4

„Maður getur ekki nógsamlega þakkað þeim sem höfðu þessa fyrirhyggju og þessa ástríðu fyrir því að tryggja það að hér væri hljómburðurinn af heimsklassa, fyrsta flokks. Það gerðist mjög snemma í þessu ferli að það valdist sem ráðgjafarfyrirtæki og samstarfsaðili félagið sem þá hét Austurhöfn, ríki og borg komu saman og voru að undirbúa þetta verkefni, verið var að skilgreina hvers konar skilmála viljum við setja þegar þetta verður allt saman boðið út, eins og var gert, á Evrópska efnahagssvæðinu – að við viljum hafa hér fyrst flokks arkitektúr og við viljum að þetta hús verði tákn í borginni, við viljum búa til nýtt svona akkeri í miðborginni. Þetta á að vera heimili Sinfóníuhljómsveitarinnar en þetta á samt að vera mjög fjölbreytt og mikið fjölnotahús,“ segir Svanhildur.

Hún segir að strax frá upphafi hafi Hörpu verið ætlað að vera ráðstefnuhöll til að styrkja Reykjavík sem alþjóðlega ráðstefnuborg. „Og það sem var algerlega grundvallaratriði sem var skrifað algerlega út í hörgul, það voru kröfurnar um hljómburðinn og öll þau gæði sem hanga á þeirri spýtu. Það eru svo ofboðslega margar ákvarðanir og margt sem hangir á þeirri spýtu svo að það geti gengið upp.“

Svanhildur segir að til að ná jafn frábærum hljómburði og er í Hörpu þurfi samspil, eðlisfræði, listar og galdurs. Harpa er aðili að samtökum evrópska tónlistarhúsa, sem nefnast ECHO. Á stjórnarfundum þar er iðulega mikið rætt einmitt um hljómburð og sali og þess háttar. „Orðsporið er svo gríðarlega dýrmætt, eins og við vitum, og fyrir svona hús þá skiptir það öllu máli, hingað koma, og hafa gert allt frá byrjun, stórkostlegar hljómsveitir eins og Berlínarfílharmónían og fleiri og fleiri sem komu hér og upplifðu það að spila í Hörpu. Það kom öllum algerlega á óvart hvað þetta var stórfenglegt og svo spyrst þetta út og þá einhvern veginn fór boltinn að rúlla. Þetta er mjög lítill heimur og núna er það þannig að það vilja allir koma hingað.“