Jóhann Páll Jóhannsson, þingmaður Samfylkingarinnar, gagnrýnir sýndarmennsku Sjálfstæðisflokksins hvað varðar kaup Landsbankans á Tryggingamiðstöðinni og lætur að því liggja að Þórdís Kolbrún Reykfjörð Gylfadóttir, fjármála- og efnahagsráðherra, hefði getað gripið inn í söluna mun fyrr, hefði hún hreinlega haft áhuga á því. Þess í stað virðist sem Sjálfstæðisflokkurinn sé að nýta sér stöðuna til að liðka fyrir frekari einkavæðingu í bankakerfinu. Þetta kom fram í ræðu Jóhanns undir liðnum Störf þingsins á Alþingi í dag.
Það hreyfist kannski lítið í samgöngumálunum en bankafarsi ríkisstjórnarinnar, hann heldur áfram, og enn þarf fólkið í landinu að horfa upp á stjórnleysi og samskiptaleysi þegar kemur að umsýslu eignarhluta ríkisins í fjármálafyrirtækjum. Það hefur legið fyrir í ÁTTA mánuði að Landsbankinn hefði hug á að kaupa TM og það eru FJÓRIR mánuðir síðan að söluferlið hófst.“
Jóhann rekur að Þórdís hafi viðrað þá skoðun sína í byrjun febrúar í hlaðvarpi að henni litist illa á þessi kaup. Hún hafi þó ekkert gert til að grípa inn í viðskiptin. Ekki fyrr en nú þegar bindandi kauptilboð er komið á, og þá ekki með þeim leiðum sem hún hefur í krafti valdheimilda sinna sem ráðherra, heldur með aumlegri færslu á Facebook. Þórdís sé vörslumaður ríkiseigna og beri ábyrgð á meðferð eignarhluta ríkisins í fjármálafyrirtækjum og að slíkt sé gert í samræmi við eigendastefnu ríkisins.
„Eigendastefnan á ekki að vera framkvæmd í einhverjum véfréttastíl þar sem ráðherra situr og spjallar í einhverju hlaðvarpi og bankasýslumenn þurfa að punkta hjá sér í fundargerðir það sem þeir heyra. Þú stjórnar ekki landi í gegnum Facebook-færslur. Ráðherra hlýtur að þurfa að koma hingað fyrir Alþingi og útskýra hvað er í gangi, hvaða sirkus þetta er eiginlega með 29 milljarða viðskipti ríkisfyrirtækis.“
Jóhann rekur að það sé ekki langt síðan að Umboðsmaður Alþingis birti svart álit um sölu ríkisins á hlut sínum í Íslandsbanka. Engu að síður hafi Þórdís ekki brugðist við fyrirhuguðum kaupum Landsbankans á TM með þeim valdheimildum sem hún hefur gagnvart Bankasýslu ríkisins og í samræmi við ábyrgð hennar á ríkiseignum.
Þessi í stað hafi Sjálfstæðismenn nýtt sér að bindandi tilboð er nú komið á til að reyna að keyra af stað frekari einkavæðingu, að losa um hlut ríkisins í Landsbankanum.
