Ingibjörg Isaksen þingflokksformaður Framsóknarflokksins gagnrýnir nýlegar þjóðlendukröfur, sem Þórdís Kolbrún Reykfjörð Gylfadóttir fjármála- og efnahagsráðherra hefur lagt fram fyrir hönd ríkisins, í færslu á Facebook-síðu sinni. Kröfurnar sem meðal annars fela í sér að megnið af Vestmannaeyjum yrði þjóðlenda hafa vakið mikla óánægju sveitarstjórnarfólks og hefur ráðherrann, sem segir eingöngu um lögbundið ferli að ræða sem hún hafi ekki haft mikla aðkomu að, svarað gagnrýninni með þeim hætti að hún ætli sér ekki að sölsa undir sig land:
Í færslunni vitnar Ingibjörg í framkomna gagnrýni sveitarstjórnarfólks um að krafan sé gríðarstórt inngrip í mat á eignarrétti og framtíðarsýn fjölmargra íbúa og landeigenda um land allt. Hún segir flestar eyjar sem kröfurnar beinist að séu þinglýstar eignir einstaklinga, sveitarfélaga og annarra aðila og í sumum tilvikum hafi ríkið selt eyjar sem það ætli nú að taka aftur til sín.
Ingibjörg segir að upphaflegur tilgangur með setningu laga um þjóðlendur hafi verið að leysa úr ágreiningi sem ríkt hafði í áratugi um eignarhald á hálendissvæðum landsins eða þeim svæðum sem lengst hafi verið nefnd afréttir og almenningar. Hinar umdeildu kröfur séu langt frá upphaflegum markmiðum laganna og gangi of langt.
„Að mínu mati er nú full langt seilst frá upphaflegum markmiðum laganna. Nú er verið að sækjast eftir landsvæði þar sem nú eru m.a. fasteignir og rúmast innan deiliskipulags sveitarfélaga. Það er eðlilegt að vakin sé athygli á þessu því ljóst er að þetta muni hafa töluverðan kostnað í för með sér fyrir sveitarstjórnir og eigendur þessara landsvæða. Að auki getur krafan skapað mikla óvissu og hamlað mikilvægri uppbyggingu og verðmætasköpun.“
