Í lok vikunnar var greint frá úthlutun Orkusjóðs á almennum styrkjum til orkuskipta árið 2023. Alls var alls 914 milljónum króna úthlutað til 58 verkefna víðsvegar um landið en meðal styrkþega eru stór og öflug fyrirtæki eins og Ísfélag Vestmannaeyja, Samherji og Orkan, dótturfélag SKEL fjárfestingafélags hf.
Þannig fékk Ísfélag Vestmannaeyja, þar sem Guðbjörg Matthíasdóttir er stærsti eigandinn, alls tæplega 110 milljóna styrk til kaupa á nýjum rafskautakatli sem nýtir endurvinnanlega orku í stað olíu.
Samherji hf., þar sem Þorsteinn Már Baldvinsson er forstjóri, fékk 100 milljón króna styrk til þess að breyta tilteknu skipi fyrirtækisins þannig að það noti kolefnisfrítt ammoníak sem eldsneyti.
Þá hlaut Orkan, dótturfélag SKEL, þar sem Jón Ásgeir Jóhannesson er stærsti eigandi, þrjá 16,4 milljón króna styrki í verkefni á Austurlandi, Vesturlandi og Suðurlandi. Um er að ræða uppbygging á hraðhleðslugámi á Skjöldólfsstöðum, uppbyggingu 400 kW færanlegrar hraðhleðslustöðvar fyrir trukka og fólksbíla á Grundafirði og Þorlákshöfn. Alls nemur styrktarupphæðin því 49,2 milljónir króna.
Þá hlaut Ölgerð Egils Skallagrímssonar 27,2 milljón króna styrk fyrir kaupum á rafmagnskatli í stað olíuketils.
Árlega geta fyrirtæki og stofnanir geta sótt um styrki í Orkusjóð vegna verkefna sem miða að því að hætta jarðefnaeldsneytisnotkun og nota í staðinn endurnýjanlega og vistvæna orku. Helstu matsviðmið eru hversu mikil olía (eða annað jarðefnaeldsneyti) fellur úr notkun fyrir tiltekna styrkupphæð – svokallað „verð á lítra“ viðmið. Alls nemur styrkupphæðin yfirleitt um 33%, án virðisaukaskatts, af heildarkostnaði við verkefnin og er meginreglan sú að upphæðin sé greidd út við lok verkefna til að takmarka fjárhagslega áhættu sjóðsins.
Hér geta lesendur kynnt sér úthlutun Orkusjóðs
