Guðrún Hafsteinsdóttir, dómsmálaráðherra, fær harða gagnrýni fyrir tillögur sínar um að greiða aðkomu fólks að gosstöðvunum á Reykjanesi.

Í nýjum náttfarapistli á Hringbraut skrifar Ólafur Arnarson að Guðrún ætti frekar að standa með löggæslufólkinu sem vill takmarka fólksfjöldann á gosstöðvunum en að leggja til stækkun bílastæðis við Vigdísarvelli og að ruddur verður vegur að gosstöðvunum og fólki beint þangað gegn vilja lögreglu.

„Þessi afstaða er óskiljanleg og hlýtur að skrifast á reynsluleysi og fljótfærni nýja ráðherrans sem langar að láta til sín taka,“ skrifar Ólafur.

Hann bendir á að Tómas Guðbjartsson, læknir og umhverfisverndarmaður, hafi snuprað Guðrúnu vegna þessara hugmynda og telji tillögur hennar stuðla að meiriháttar umhverfisslysi. Tómas bendi á að gróður á þessum slóðum sé afar viðkvæmur og taka þurfi tillit til þess.

Ólafur hnykkir út með því að fullyrða að Jón Gunnarsson, forveri Guðrúnar í embætti, „hefði ekki látið bjánaskap af þessu tagi stjórna sínum gjörðum.“

Náttfara í heild er hægt að lesa hér.