Ágreiningur innan ríkisstjórnarinnar kom í veg fyrir að meirihlutaviljinn á Alþingi fengi ráðið varðandi áframhaldandi innflutning á kjúklingum frá Úkraínu.

Þetta segir Þorbjörg Sigríður Gunnlaugsdóttir þingmaður Viðreisnar í færslu sem hún birti á Facebook nú eftir hádegið.

„Það er nánast ár upp á dag frá því að sett voru lög um tollfrjálsan innflutning á landbúnaðarvörum frá Úkraínu. Samhugurinn á Alþingi var sterkur. Ári seinna er tónninn annar,“ skrifar Þorbjörg Sigríður.

Hún rifjar upp að tilefni lagasetningarinnar hafi verið beiðni frá Úkraínu til EFTA ríkjanna en við innrás Rússa í febrúar á síðasta ári lokaðist fyrir útflutning um hafnir landsins við Svartahaf. Hún nefnir einnig að formaður efnahags- og viðskiptanefndar Alþingis hafi vitnað í orð forseta Úkraínu á Alþingi mánuði fyrr er hann sagði:

„Augljóst er að stríð Rússa gegn Úkraínu er ekki aðeins tilraun til að sölsa undir sig landið og að slökkva líf, það er árás á frelsið sjálft. Þess vegna er mikilvægt fyrir frjálsar þjóðir heims að Úkraína verði ekki skilin eftir á berangri og berjist þar ein og afskipt við Rússland. Það er mikilvægt að allar þjóðir leggi hönd á plóg. Ég er þakklátur fyrir þau skref sem þjóð ykkar hefur nú þegar stigið, sérstaklega með því að styðja viðskiptaþvinganir gegn Rússum. Ég þakka einnig fyrir margvíslegan stuðning sem þið hafið sýnt okkur og heiti á ykkur að láta ekki þar við sitja.“