Héraðsdómur Reykjavíkur hefur sýknað endurskoðunarfyrirtækið KPMG af rúmlega 715 milljón króna bótakröfu Sjöstjörnunnar ehf, fyrirtækis sem er í eigu Skúla Gunnars Sigfússonar, gjarnan kenndum við Subway.
Málið var höfað vegna þess að tvær fasteignir í eigu Sjöstjörnunnar, við Eyrarveg 2 á Selfossi og aðrar tvær í Ölfusi, voru kyrrsettar í kyrrsetningaðgerð sýslumanns vegna máls sem tengist gjaldþroti Eggert Kristjánssonar hf., sem síðar var nefnt EK1923 ehf.
Eftir gjaldþrot EK1923 ehf. þá fór skiptastjóri búsins, Sveinn Andri Sveinsson, fram á að gjörningi þar sem að fasteign félagsins, við Skútuvog 3, sem var seld út út fyrirtækinu nokkru fyrir gjaldþrotið til Sjöstjörnunnar ehf., yrði rift á grundvelli þess að um gjafagjörning væri að ræða og að fasteignir Sjöstjörnunnar yrðu kyrrsettar til tryggingu mögulegra skaðabóta. Fasteignin var seld út úr félaginu á 475 milljónir króna en skiptastjóri taldi hana mun verðmætari.
Af því hlaust langt dómsmál sem endaði með því að skiptastjóri vann sigur í málinu í Hæstarétti og var Sjöstjörnunni gert að greiða ríflega 324 milljónir króna til þrotabúsins.
Í kjölfarið af þeim úrskurði höfðaði Sjöstjarnan ehf. mál á hendur KPMG og til vara lögfræðistofunni Logos slf. þar sem farið var fram á áðurnefndar skaðabætur þar sem að fyrirtækin höfðu séð um svokallaða skiptingaáætlun þegar fasteignin við Skútuvog var seld yfir í Sjöstjörnuna. Það hafi þeim farist illa úr hendi og þar með skapað sér skaðabótaábyrgð.
Á þessi rök þrír dómarar Héraðsdóms Reykjavíkur ekki og komust í einfölduðu máli að þeirri niðurstöðu að Skúli hafi sjálfur tekið ákvörðun um að selja fasteigna út úr Eggerti Kristjánssyni hf. og að hann hefði sjálfur átt að átta sig á því að um undirverð væri að ræða sem skaðaði rekstrarhæfi Eggert Kristjánssonar hf.
Hér má lesa dóm Héraðsdóms Reykjavíkur í heild sinni.
