Sveitarstjórn Langanesbyggðar hefur ákveðið að kaupa flak DC flugvélar í landi Sauðanes. Þetta var samþykkt á sveitastjórnarfundi þann 16. mars síðastliðinn. Flakið var í fréttum í fyrravor vegna kvartana bónda í Sauðanesi yfir ágangi ferðamanna sem sýna flakinu áhuga.
Á Sauðanesi var áður flugvöllur þar sem Bandaríkjaher hafði aðstöðu. Árið 1969 rak flugvél af gerðinni Douglas DC-3 (R4D-S) annan vænginn í flugbrautina við lendingu. Við hnjaskið skemmdist hjólabúnaður vélarinnar og vængurinn. Vængirnir voru fluttir burtu á safn árið 1996 en flakið hefur staðið eftir á túninu í Sauðanesi.
Bóndinn í Sauðanesi hefur viljað lsona við flakið út af ágangi ferðamanna. Í fundargerð sveitarstjórnar (18. liður) Langanesbyggðar segir svo um tillögu að kaupunum:
„Lagt er til að sveitarfélagið kaupi flak DC 3 vélar í landi Sauðaness og komi því fyrir á einhverjum stað í sveitarfélaginu þar sem það gæti verið aðgengilegt enda hefur það mikið aðdráttarafl fyrir ferðamenn. Lögð fram drög að kaupsamningi með fyrirvara um samþykki sveitarstjórnar.“
L-listi lagði til að málinu yrði vísað frá á þeim forsendum að forgangsraða eigi skattfé almennings á eðoliilegan hátt. Sveitarstjórn samþykkti hins vegar kaupin og faldi sveitarstjóra eftirfarandi:
a) Auglýsa eftir aðilum sem vilja taka að sér flakið til varðveislu og/eða hagnýtingar innan sveitarfélaga marka.
b) Auglýsa eftir tillögum að staðsetningu flaksins innan sveitarfélaga marka.
L-listinn lýsti yfir furðu sinni á þessari niðurstöðu og þykir skjóta skökku við að sveitarstjórn kaupi 60 ára gamalt flugvélarflak á meðan ekki séu til peningar til að auka þjónustu við íbúa og sinna framkvæmdum:
„Á þessu kjörtímabili hefur meirihluti frestað eða hætt við nauðsynlegar framkvæmdir í sveitarfélaginu, tekið ákvarðanir um umdeildar launagreiðslur til oddvita og fyrrum framkvæmdastjóra, frestað ráðningu á starfsmanni skrifstofu með tilheyrandi tímabundnum vanda á skrifstofu og nú leggur meirihlutinn til að kaupa 60 ára gamalt flugvélaflak í því skyni að gera úr því aðdráttarafl fyrir ferðamenn. Fulltrúar L-lista lýsa furðu sinni yfir þessu háttalagi meirihluta á meðan ekki eru til peningar til að auka þjónustu við íbúa, fara í framkvæmdir og viðhald.“
Samkvæmt heimildum DV eru áhöld um hvort flakið teljist í eigu ábúanda á Sauðanesi eða ríkisins en Sauðanes er ríkisjörð.
