Orðið á götunni þessa daganna er að varla sé tilviljun að Hannes Hólmsteinn Gissurarson, fyrrverandi prófessor við Háskóla Íslands, hafi einmitt núna séð ástæðu til fara mikinn a Facebook-síðu sinni og saka þjóðþekkt fólk um að leka vondum fréttum um sig. Hann teygir sig alveg aftur til ársins 1988 til að nefna dæmi um meintan leka sem var honum í óhag. Hannes þarf varla að gera ráð fyrir því að fólk sé almennt að velta fyrir sér 35 ára gömlum málum sem varða hann og ólíklegt verður að teljast að menn séu að spögúlera mikið í honum eða því sem um hann er sagt.

En Hannes Hólmsteinn hefur fyrir því að rifja upp sjö tilgreind mál sem teygja sig yfir áratugi og varða meinta leka á fréttum af broguðum ferli hans. Er hér um að ræða einhver mikilvæg mál fyrir fólkið í landinu og hverjum ætti ekki að vera sama þó Guðmundur Ólafsson, háskólakennari, eða Rósa Björk Brynjólfsdóttir, fyrrum Alþingismaður, hafi sagt eitthvað við fjölmiðla sem kom Hannesi illa? Orðið á götunni er að vitanlega liggi fiskur undir steini því upphlaup Hannesar Hólmsteins séu yfirleitt ekki háð tilviljunum.

Nú virðist Hannesi vera órótt vegna lekamála og umtals sem gæti komið sér illa fyrir hann. Í slíkri stöðu gæti verið heppilegt að koma af stað umtali um að það sé hvort sem er alltaf verið að leka einhverjum óheppilegu um hann. Þeir sem hafa fylgst með Hannesi Hólmsteini vita að hann er slóttugur og reynir gjarnan að gera pólitíska andstæðinga harðlínumanna í Sjálfstæðisflokknum tortryggilega. Nú gæti verið rétti tíminn til að þyrla upp moldviðri. Svo gæti farið að ekki liði á löngu þar til skýringar á því komi fram í dagsljósið með afgerandi hætti.

Orðið á götunni er að vinstri sinnaður blaðamaður lumi á bombu um Hannes Hólmstein sem gæti verið á leið í loftið, annað hvort sem blaðagrein eða hluti bókar. Um er að ræða efni sem margir þykjast hafa vitað sitthvað um í langan tíma án þess að það hafi ratað upp á yfirborðið. Eitthvað sem gleymist ekki þó liðin séu mjög mörg ár.

Það skyldi þó ekki vera að senn komi skýringin á einkennilegri upprifjun Hannesar Hólmsteins á meintum áratugagömlum lekamálum tengdum honum? Sjáum til.