Helgi Áss Grétarsson, varaborgarfulltrúi Sjálfstæðisflokksins, kemur styttunni af séra Friðriki Friðrikssyni til varnar í grein sem birtist hjá Vísi í dag. Segir hann fyrirliggjandi sönnunargögn um misgjörðir guðsmannsins rýr.
Borgarráð samþykkti samhljóða í vikunni að leita umsagna KFUM, KFUK og Listasafns Reykjavíkur um hvort fjarlægja ætti styttuna „Séra Friðrik og drengurinn“ sem stendur við Lækjargötu. Kolbrún Baldursdóttir, borgarfulltrúi Flokks fólksins, hafði lagt fram tillögu þess efnis að hún yrði fjarlægð.
Ástæðan hefur varla farið fram hjá neinum. Það er vitnisburður manns sem segir séra Friðrik hafa þuklað á kynfærum sínum þegar hann var tíu ára gamall í nýrri bók sagnfræðingsins Guðmundar Magnússonar um guðsmanninn sem var umsvifamikill í æskulýðsstarfi á fyrri hluta síðustu aldar.
Fleiri hafa leitað til Stígamóta vegna séra Friðriks og hávær umræða hefur skapast um hvort það þurfi ekki að fjarlægja styttuna, sem stendur bæði á áberandi stað í miðborginni og sýnir séra Friðrik snerta ungan dreng.
„Nýlega hafa verið settar fram ásakanir á hendur séranum en í nýútkominni bók er haft eftir nafnlausum heimildarmanni að sérann hafi áreitt sig kynferðislega. Talskona tiltekinna hagsmunasamtaka sté svo fram og vísaði til þess í fjölmiðlaviðtölum að samtökin hefði vitnisburð undir höndum sem hefði að geyma sambærilegar frásagnir. Þessar frásagnir eru einnig nafnlausar. Engin rannsókn hefur farið fram á þessum ásökunum svo fullnægjandi sé,“ segir Helgi Áss í greininni.
„Með öðrum orðum, fyrirliggjandi sönnunargögn um meintar misgjörðir sérans eru rýr. Hins vegar er ekki útilokað að ný gögn kunni að koma fram sem varpað geta skýrara ljósi á málið.“
Helgi óttast það að borgarráð sé að feta inn á þær brautir að ásakanir, studdar takmörkuðum sönnunargögnum, dugi til fjarlægja styttur úr borgarlandinu.
„Spyrja þarf því, hvaða styttu á hugsanlega að fjarlægja næst? Var sem dæmi, Ingólfur Arnarson, landnemi, með hreinan skjöld? Hvað með Hannes Hafstein ráðherra og Jón Sigurðsson forseta?“ spyr Helgi. „Með öðrum orðum, hvar endar þráin til að vaka yfir (e. woke) sögulegu óréttlæti?“
Nefnir hann að það hafi verið vegna „woke-æðisins“ úti í heimi sem komið hafi kröfur um að stytta af Winston Churchill yrði fjarlægð úr London.
„Þróun af þessu tagi þykir mér varhugaverð. Ég er á móti henni og er sú afstaða mín í samræmi við grunngildi borgaralegrar stjórnmálastefnu,“ segir Helgi að lokum.
