Nú síðast játaði Jenna Ellis, stuðningskona hans, að hafa haft rangt við í Georgíuríki þegar hún, ásamt fleirum úr lögfræðingateymi Trump, reyndu að snúa úrslitum forsetakosninganna við.
Trump er ásamt Ellis og 17 öðrum til viðbótar ákærður fyrir að hafa reynt að hafa rangt við með því að snúa úrslitum kosninganna við. Saksóknari gaf ákæruna út á grunni ákvæðis er varðar skipulagða glæpastarfsemi.
Ellis játaði fyrir dómi að hafa dreift röngum fullyrðingum um forsetakosningarnar og hafi það verið hluti af verkefni hennar sem meðlims í „úrvalsliði“ lögfræðinga. Hún verður dæmd í fimm ára skilorðsbundið fangelsi, til að greiða 5.000 dollara í sekt og til að sinna samfélagsþjónustu í 100 klukkustundir. Auk þess hefur hún skrifað bréf til íbúa í Georgíu og beðið þá afsökunar. Hún gerði einnig samning við saksóknara um að bera vitni gegn Trump.
Áður hafði Sidney Powell, fyrrum lögmaður Trump, játað sekt í málinu eftir að hún gerði samning við saksóknara. Það kom mörgum á óvart því hún er meðal þeirra sem hafa gengið harðast fram í að halda því fram að sigrinum í forsetakosningunum hafi verið stolið frá Trump.
Ken Chesebro, sem er þekktur lögmaður, hefur einnig játað sekt í málinu og það gerði Scott Hall, kosningaeftirlitsmaður úr röðum Repúblikana, einnig.
Allar þessar játningar virðast vera að færa málið yfir á nýtt og hættulegt stig fyrir Trump.
