Meðal þeirra sem greina kosningaúrslitin í dag er Hannes Hólmsteinn Gissurarson, prófessor emeritus. Hannes segir að þeir flokkar sem hafa að geyma marga hefðbundna kjósendur Sjálfstæðisflokksins hafi náð samtals 60% fylgi. Samfylkingin sé eini vinstri flokkurinn á þingi.

Hannes segir að Sjálfstæðisflokkurinn hafi misst talsvert fylgi en ekki goldið afhroð eins og hinir stjórnarflokkarnir tveir, Framsókn og VG. Hins vegar ætti Sjálfstæðisflokkurinn að vera hvíldinni feginn ef hann fer ekki í stjórn. Hannes birti svohljóðandi Facebook-færslu um kosningaúrslitin:

„Þótt Sjálfstæðisflokkurinn missti talsvert fylgi (um fimmtung þess) og líklega tvö þingsæti, galt hann ekki afhroð eins og hinir stjórnarflokkarnir, Framsókn og Vinstri grænir, sem misstu átta þingsæti hvor, en Vinstri grænir þurrkuðust nánast út. Tveir sæmilega eðlilegir samstarfsmöguleikar virðast hafa þingmeirihluta, Samfylking, Viðreisn og Flokkur fólksins og Sjálfstæðisflokkur, Viðreisn og Miðflokkurinn. Það er fróðlegt, að þrír flokkar, sem allir hafa að geyma marga hefðbundna kjósendur Sjálfstæðisflokksins, Viðreisn, Miðflokkurinn og auðvitað Sjálfstæðisflokkurinn sjálfur, skuli samanlagt fá verulegt fylgi, 47% um það bil, og má raunar bæta Flokki fólksins þar við, og þá yrði þessi „mið-hægri“ fylking með um 60% fylgi. Samfylkingin er eini vinstri flokkurinn, sem er eftir á þingi, með rösklega 21% fylgi. Kosningarnar fólu í sér mikinn ósigur vinstriaflanna á Íslandi. Það er líklega aðalfréttin. Hvað varð um það 30% fylgi, sem Samfylkingin átti að njóta samkvæmt skoðanakönnunum í upphafi kosningabaráttunnar? En því miður tel ég líklegast, að Viðreisn halli sér eins og í Reykjavíkurborg að Samfylkingunni og með sama hörmulega árangrinum. Sjálfstæðisflokkurinn á auðvitað ekki að skorast undan ábyrgð, en hann ætti samt að vera hvíldinni feginn, fengi hann að njóta hennar.“