Kristrún Frostadóttir, formaður Samfylkingar, skaut föstum skotum á Bjarna Benediktsson og Sjálfstæðisflokkinn í ræðu sinni á fundi flokkstjórnar Samfylkingarinnar í dag. Fundurinn er fram í Hofi á Akureyri.
Kristrún sagðist lítið hafa að segja um upphlaupin og ringulreiðina í ríkisstjórninni þessi misserin. Hins vegar ríkti óstjórn í efnahagsmálum og ljóst að fráfarandi fjármálaráðherra skili ekki góðu búi. 8 prósenta verðbólgu og stýrivöxtum í 9,25 prósentum.
„Og nú heyrast neyðaróp frá Landhelgisgæslunni — eins og við heyrðum frá Fangelsismálastofnun í fyrra. Dómsmálaráðherra svaraði fyrirspurn minni um þetta á Alþingi á þá leið að Landhelgisgæslan væri vissulega vanfjármögnuð og væri búin að gera allt sem í hennar valdi stæði til að hagræða. Ef ekki fengist meira fjármagn — þá þyrfti að selja þyrlu, flugvél eða skip,“ sagði Kristrún í ræðunni. „Hvers konar stjórnarhættir eru þetta? Og hvers konar arfleifð er þetta — eftir áratug með ráðuneyti fjármála og ráðuneyti dómsmála? Þessi staða er hreint og beint til skammar fyrir Sjálfstæðismenn.“
Þetta væri til marks um að efnahagsstefna Bjarna hafi verið komin í þrot. Burt séð frá bankasölunni og þrátt fyrir að Katrín Jakobsdóttir forsætisráðherra gerði allt sem í hennar valdi stendur til að verja arfleið Sjálfstæðismanna í efnahagsmálum og arfleið þeirra við einkavæðingu banka sem hlotið hafi áfellisdóm Ríkisendurskoðunar, Seðlabankans og nú Umboðsmanni Alþingis.
„Mikil orka hefur farið í að ræða um persónu fráfarandi fjármálaráðherra í vikunni, og því m.a. velt upp að formaður Sjálfstæðisflokksins hafi mögulega styrkt stöðu sína — þegar hann sagði af sér einu valdamesta embætti landsins, sem hann hefur gegnt í áratug. Hvað get ég sagt? Ég held satt best að segja að slíkar bollaleggingar séu víðs fjarri veruleika venjulegs fólks og skipti litlu máli,“ sagði Kristrún.
Kristrún lýsti stefnu Samfylkingarinnar í ræðunni og sagði að þó að skoðanakannanir litu vel út væri ekki rétti tíminn til að ofmetnast og halla sér aftur. Engu ætti að taka sem gefnu. Samfylkingin ætlaði sér ekki að gera sömu mistök og aðrir stjórnarandstöðuflokkar sem mælst hafa vel á miðju kjörtímabili en svo mistekist að ávinna sér traust þjóðarinnar í raun þegar á hólminn var komið.
„Við ætlum ekki að lofa öllu fögru. Við ætlum ekki að fara fram með ósamrýmanleg markmið. Og við ætlum ekki að sóa tíma í einhvern pólitískan æsing,“ sagði Kristrún. „Það er þess vegna sem við erum að undirbúa okkur og taka þetta málefnastarf svona alvarlega. Eitt skref í einu. Allt samkvæmt áætlun.“
Lýsti hún meðal annars áherslum í atvinnu og samgöngumálum og efnahags og skattamálum til að tryggja velferð.
„Mín skilaboð til ríkisstjórnarinnar og nýs fjármálaráðherra eru þessi: Kjarapakki Samfylkingarinnar er besta leiðin til að milda þetta högg sem nú hlýst af verðbólgunni og koma í veg fyrir að ástandið vindi óþarflega upp á sig. Takið hann bara. Þið megið eiga þessar tillögur og taka heiðurinn. Okkur er sama — við viljum bara sjá verðbólguna og vextina fara niður,“ sagði Kristrún.
