Jakob Frímann Magnússon, þingmaður Flokks fólksins segir hægt að fjármagna rafmagnshraðlest frá Reykjavík til Keflavíkur fyrir erlenda peninga, láta erlenda ferðamenn borga hana í gegnum notkun á henni. Slík framkvæmd eigi ekki og megi ekki valda þenslu og sársauka fyrir almenning hér á landi. Hann segir ferðaþjónustuaðila innan Gullna hringsins telja að innan fimm ára geti fjöldi ferðamanna hér á landi tvöfaldast.

Jakob Frímann er gestur Ólafs Arnarsonar í hlaðvarpi Markaðarins á Eyjunni.

Markaðurinn - Jakob Frímann Magnússon - 2.mp4

„Nú tek ég sem dæmi gamla og viðvarandi hugmynd um rafmagnslest frá Reykjavík til Keflavíkur. Það er hægt að fjármagna slíka nútímalega hraðlest með erlendum peningum og notendurnir eru stærstan part erlendir þannig að slík framkvæmd sem er niðurgreidd bókstaflega af notendunum sjálfum, með erlendum greiðslukortum, á ekki að þurfa að hafa nein áhrif á hagkerfið hér. Hún hvorki á né má gera það,“ segir Jakob.

Hann segir sama gilda um vegina. „Nú erum við smám saman að sammælast um það að þeir borga sem nota og notendurnir eru ekki lengur íslenskir heldur eru þeir mestan part erlendir. Þeir eiga að borga fyrir notkun á vegunum og þannig niðurgreiða þann kostnað sem verður af því að gera þá boðlega.“

Jakob segir alltaf sett samasemmerki milli þess að fjárfesta í innviðum og svo öllum þeim verkjum sem þenslan veldur blásaklausu fólki sem ekkert hefur að gera með ferðaþjónustuna eða innviðauppbyggingu.

„Hitt er auðvitað líka að við erum á þeim stað í dag að vera með 2,2 milljónir ferðamanna á blaði, en það er miklu nær því að vera 2,6 milljónir þegar þú tekur alla farþegana með, skipafarþegana líka. Þessir aðilar sem ferðast um í rútu, sem sagt aðilar „Gullna hringborðsins“, ábyrgir og mætir aðilar á vettvangi, sveitarstjóri og alls kyns stólpar á Gullna hringssvæðinu. Þeir ferðuðust með okkur á svæðinu frá þjóðgarði þar sem fyrsti fundurinn var haldinn í þessari dagsferð okkar í umhverfis- og samgöngunefnd og á leiðinni vorum við að giska á það hvað það tæki langan tíma fyrir þennan fjölda, sem officialt í dag er 2,2 milljónir, að verða 4,4 milljónir. Niðurstaðan var fimm ár.