Vextir eru mannanna verk, persónulegar ákvarðanir fólks, segir Björn Berg Gunnarsson, fjármálaráðgjafi og fyrrum forstöðumaður greiningar- og fræðslu hjá Íslandsbanka. Björn er viðmælandi Ólafs Arnarsonar í hlaðvarpi Markaðarins á Eyjunni.

Markaðurinn - Björn Berg - Vextir

Björn segist hafa fundið önnur viðbrögð við síðustu vaxtahækkunum Seðlabankans en fyrr, breyttan tón. Meiri efasemdir séu um hækkanirnar nú en áður. Þær gætu valdið aukinni verðbólgu seinna meir. Raunveruleikinn sé að þegar vextir verða of háir hætti verktakar að byggja húsnæði. Ef svo fari að verktakar haldi að sér höndunum vegna þess að þeir þurfi að fjármagna sig á jafnvel 15-20 prósent vöxtum, þeir sjái fram á að dæmið gangi ekki upp og bíði, fari ekki í framkvæmdir, en á sama tíma fjölgi okkur mikið vegna innflutnings fólks, sem bætist ofan á það að margir bíði nú og fresti annað hvort flutningum eða innkomu á markaðinn, geti orðið alvarlegt ástand hér þegar vextir fari að lækka á ný.

Eftir tvö til þrjú ár getur húsnæðisverð rokið upp á nú einmitt út af þessu, segir Björn Berg. Þá erum við aftur komin í þessa verðbólgu. „Þetta eru áhyggjur sem við höfum heyrt frá Samtökum iðnaðarins sem vita hvað þau eru að segja um verktakana því að þau eru í daglegu samtali við þá,“ segir hann.

Þessir háu vextir mega þess vegna ekki vara mjög lengi, að mati Björns Berg.

Hann telur að lausnin felist í einhvers konar þjóðarsáttarmódeli þar sem allir koma að borðinu, ekki aðeins aðilar vinnumarkaðarins.