Jón Gunnarsson, dómsmálaráðherra, þakkar fyrir veru sína í ráðherrastóli og þakkar fyrir traust, stuðning og aðhald í embætti. Eins og kom fram í fréttum fyrr í dag er dagurinn í dag sá síðasti sem Jón gegnir embættinu og tekur Guðrún Hafsteinsdóttir við embættinu á morgun á ríkisráðsfundi.

Sjá einnig: Guðrún verður dómsmálaráðherra á morgun

„Það hefur ekki farið framhjá neinum að ýmislegt hefur gengið á hjá okkur í dómsmálaráðuneytinu. Margir málaflokkar ráðuneytisins hafa staðið á tímamótum, þá sérstaklega útlendingamál og löggæsla, og hefur ýmsum framfaramálum verið ýmist lokið eða ýtt úr vör. Við höfum orðið varir við að þetta hefur verið erfiður tími fyrir þá sem eru ekki fylgjandi Sjálfstæðisflokknum í skoðunum,“ segir Jón í færslu á Facebook.

„Auðvitað hefðum við kosið að geta fylgt eftir mikilvægum málum sem lagður hefur verið góður grunnur að, en svona er pólitíkin,“ segir Jón, en stuðningsmenn hans eru sagðir hafa þrýst á að hann fengi að sitja áfram sem ráðherra.

„Eftirmönnum okkar í ráðuneytinu færum við bestu óskir um farsælt starf. Við þökkum ykkur fyrir traustið, stuðninginn og aðhaldið sl. misseri. Sérstakar þakkir fær starfsfólkið í dómsmálaráðuneytinu—hreint út sagt frábært samstarf.“

Með Jóni kveðja einnig aðstoðarmenn hans, Brynjar Níelsson og Ingvar Smári Birgisson.