Þingmaður Framsóknar segir harkalegar aðgerðir Seðlabankans stuðla að neyðarástandi á íbúðamarkaði þar sem nú safnist í snjóhengju kynslóða sem komist ekki út á íbúðamarkaðinn en muni ryðjast þangað á einhverjum tímapunkti með alvarlegum afleiðingum.

Samkvæmt greiningu Samtaka iðnaðarins, sem kynnt var í byrjun mánaðar, fækkar íbúðum í byggingu um 65 prósent á næstu tólf mánuðum miðað við tólf mánuðina á undan.

Ágúst Bjarni Garðarsson, þingmaður Framsóknar og varaformaður efnahags- og viðskiptanefndar, segir í aðsendri grein á Eyjunni helstu ástæðuna vera miklar vaxtahækkanir Seðlabankans og hert skilyrði bankans um veðhlutfall og greiðslumat.

Þingmaðurinn segir Seðlabankann með þessu vera að hlaða í snjóhengju kynslóða sem ekki komist inn á húsnæðismarkaðinn nú en muni á einhverjum tímapunkti ryðjast út á markaðinn með miklum afleiðingum að óbreyttu.

Segir hann hávaxtastefnu Seðlabankans vera verðbólguhvetjandi vítahring hækkandi húsnæðisverð og vaxta. Hann segir fólki með góða greiðslugetu sem borgi háa húsaleigu vera haldið af fasteignamarkaði og lausar íbúðir endi nú í höndum fjármagnseigenda, hinir ríku verði ríkari á meðan venjulegt fólk sé dæmt til vistar á leigumarkaði.

Ágúst Bjarni gagnrýnir einnig sveitarfélögin fyrir að útvega ekki nægilegt nýtt byggingarland. Hann telur mikilvægt að stíga skref til baka og létta reglur um veðsetningu lána fyrstu kaupenda, auk þess sem rétt sé að horfa til raunverulegrar greiðslugetu.

Þingmaðurinn vill tímabundnar sértækar aðgerðir í þágu þeirra sem fyrirhuga byggingu hagkvæmra íbúða á næstu mánuðum og nefnir að undanskilja megi þá aðila frá fyrirhugaðri lækkun endurgreiðslu virðisaukaskatts úr 60 prósentum í 35 prósent vegna framkvæmda við íbúðarhúsnæði.

Þá vill hann lífeyrissjóðina inn í uppbyggingu leigumarkaðar og telur nauðsynlegar lagabreytingar vegna þess ekki fyrirstöðu.

Grein Ágústs Bjarna má lesa hér.