Samiðn – samband iðnfélaga – undirritaði í dag kjarasamning við Orkuveitu Reykjavíkur (OR). Þetta kemur fram í fréttatilkynningu frá félaginu en gildistími kjarasamningsins er frá 1. nóvember 2022 til 31. janúar 2024.
Fram kemur að samningurinn sé á sambærilegum nótum og kjarasamningar sem undirritaðir voru fyrir áramót við Samtök atvinnulífsins. Gert er ráð fyrir að félagsmönnum verði kynntur samningurinn á næstu dögum.
„Það er fagnaðarefni að samningur hafi náðst vegna Orkuveitu Reykjavíkur. Þessi áfangi er okkur byr í seglin í yfirstandandi samningaviðræðum við aðra hópa,“ segir Hilmar Harðarson, formaður stjórnar Samiðnar í tilefni undirritunarinnar.
