Til harkalegra orðaskipta kom á milli þingmannanna Ásmundar Friðrikssonar, hjá Sjálfstæðisflokki, og Helgu Völu Helgadóttur, Samfylkingu, eftir atkvæðagreiðslu um útlendingafrumvarpið á Alþingi í gærkvöld. Mbl.is greinir frá þessu.
Á upptöku af þingfundi má heyra Helgu Völu segja: „Hættu að ljúga Ásmundur Friðriksson, hættu að ljúga,“ eftir að hún gerði grein fyrir atkvæði sínu. Helga Vala segir við mbl.is að hún hafi heyrt Ásmund segja við sessunaut sinn að hún hafi hagsmuna að gæta varðandi flóttafólk og því sé ekkert að marka hana.
„Hann var að ljúga að ég væri í eigin hagsmunum fjárhagslegum, þegar ég væri að tala um málefni fólks á flótta. Að það væri ekkert að marka það sem ég segði því ég væri að græða svo mikið á flóttafólki,“ segir Helga Vala. Segir hún að Ásmundur viti betur. Hún hafi vissulega verið talsmaður fólks á flótta á árunum 2011 til 2014 en hún sé ekki lengur í því starfi. Hún hafi enda verið þingmaður síðustu fimm ár.
Segir Helga Vala að Ásmundur kjósi að ljúga þó að hann viti sannleikann í þessu.
„Hann virðist ganga út frá því að fólk geri aldrei neitt nema græða á því sjálft. Það er fyrsta hugsun hjá honum einhverra hluta vegna,“ segir Helga Vala.