Það hafa lengi verið vangaveltur um minni Joe Biden, Bandaríkjaforseta, og hvort hann glími jafnvel við elliglöp en hann verður áttræður í nóvember. Umræðan um þessi mál hefur verið töluverð eftir að Biden kom fram á ráðstefnu í Hvíta húsinu á miðvikudaginn þar sem umræðuefnið var hungursneyð. Úr ræðustól kallaði Biden á Jackie Walorski sem lést í bílslysi í ágúst.

Walorski var þingmaður Repúblikana á Bandaríkjaþingi en hún lést í umferðarslysi í byrjun ágúst.

Á ráðstefnunni kallaði Biden ítrekað á Walorski og svipaðist um eftir henni meðal ráðstefnugesta, en eins og gefur að skilja án árangurs. Það var ekki annað að sjá og heyra en að hann væri sannfærður um að hún ætti að vera á staðnum.

"Jackie, where's Jackie?," Joe Biden says about Rep. Jackie Walorski who died in a car accident a few months ago. pic.twitter.com/khdiesmEsx

— Greg Price (@greg_price11) September 28, 2022

Þegar Walorski lést sendi Hvíta húsið frá sér fréttatilkynningu fyrir hönd Bidenhjónanna þar sem þau sögðu að þeim væri „brugðið“ og væru „döpur“ yfir fréttunum um andlát Walorski.

En þessu virtist Biden hafa gleymt á miðvikudaginn.

Karine Jean-Pierre, fréttafulltrúi Hvíta hússins, sagði að með þessu hafi Biden verið að „hrósa frábæru starfi Walorski“.

Repúblikanar voru fljótir að taka við sér eftir atvikið og hafa rætt það fram og aftur og hafa sumir sagt þetta vera „hræðileg og skammarleg mistök“ hjá forsetanum.