Á einu ári hefur verð lítilla íbúða í fjölbýli á höfuðborgarsvæðinu hækkað um 27%. Teikn eru á lofti um að verð á stærri eignum sé farið að lækka en verð þeirra minnstu heldur greinilega áfram að hækka.

Fréttablaðið skýrir frá þessu í dag.  Fram kemur að íbúðir undir 80 fermetrum haldi áfram að hækka í verði. Í júlí hafi meðal fermetraverð íbúða, í þessum stærðarflokki, í fjölbýli verið 826.000 krónur en hafi verið 819.000 í júní. Þetta kemur fram í fasteignamæliborði Deloitte.

Fyrir ári var fermetraverðið 651.000 krónur og hefur því hækkað um tæplega 27%.

Dýrustu litlu íbúðirnar eru í Vatnsmýri og Skerjafirði en þar nálgast fermetraverðið eina milljón. Þar á eftir koma Smára-, Linda- og Salahverfi í Kópavogi með fermetraverð upp á 970.000 krónur.

Ódýrustu litlu íbúðirnar eru í Breiðholti en þar er fermetraverðið 639.000 krónur.

Nánar er hægt að lesa um málið í Fréttablaðinu í dag.