Nýr meirihluti tekur við í Reykjanesbæ á bæjarstjórnarfundi þann 7. júní næst komandi. Þetta kemur fram í tilkynningu frá fulltrúum meirihlutans, Halldóru Fríðu Þorvaldsdóttur oddvita Framsóknar, Friðjóns Einarssonar oddvita Samfylkingarinnar og Valgerðar Pálsdóttur oddvita Beinnar leiðar.
Helstu áhersluatriði nýs meirihluta eru „að viðhalda kröftugri uppbyggingu og horfa til framtíðar. Mikil fólksfjölgun og breytt samfélagsmynstur kallar á aukna þjónustu og hraða uppbyggingu innviða. Brýnt er að mæta þeirri þörf en í senn að tryggja áfram trausta fjármálastjórn.“
Málefnasamningur var undirritaður í morgun klukkan 11:30.
Kjartan Már Kjartansson verður áfram bæjarstjóri og Friðjón Einarsson oddviti Samfylkingar verður formaður bæjarráðs fyrri hluta kjörtímabils og svo mun Halldóra Fríða taka við af honum. Halldóra verður fram að því forseti bæjarstjórnar.
„Meirihlutinn mun leiða mikilvæg verkefni á næstu árum í góðu samstarfi við fulltrúa allra flokka í bæjarstjórn og íbúa Reykjanesbæjar. Það eru bjartir tímar framundan og saman munum við gera gott samfélag enn betra.
Reykjanesbær er eitt stærsta fjölmenningarsamfélag landsins, tækifærin sem felast í því eru fjölmörg. Nýr meirihluti mun vinna markvisst að því að efla samstarf við atvinnulífið og félagasamtök í bænum með það fyrir augum að samfélagið allt styðji þá aðila, sem kjósa að setjast hér að, til virkni í samfélaginu.“
