Fulltrúar Samfylkingarinnar, Framsóknar, Pírata og Viðreisnar funduðu í sjö klukkustundir í gær um myndun meirihluta í borgarstjórn. Velferðarmál voru til umræðu. Viðræðurnar gætu tekið tíu daga að sögn Einars Þorsteinssonar oddvita Framsóknarflokksins.

Fréttablaðið skýrir frá þessu í dag og hefur eftir Einari að málefni barna, íþróttamál, leikskólamál og önnur mál tengd velferð barna hafi verið ræddd sem og málefni eldra fólks og mál tengd fjölmenningarsamfélagi. Hann sagði að góður samhljómur væri hjá flokkunum á þessum sviðum.

Einar sagði góðan anda vera í hópnum. Helstu málefnasviðum hafi verið skipt í flokka sem fulltrúarnir muni síðan vinna sig í gegnum hægt og rólega.

Málefni flugvallarins í Vatnsmýri hafa ekki enn verið rædd að sögn Einars en flokkarnir hafa mismunandi stefnu í málefnum hans.

Hvað varðar tímalengd viðræðnanna sagðist Einar ekki vita hvenær þær klárast. „Við gefum okkur bara þann tíma sem við þurfum, er ekki ágætt að miða við 7. júní?“ sagði hann en fyrsti borgarstjórnarfundur nýkjörinnar borgarstjórnar er þá á dagskrá.