Formlegar meirihlutaviðræður Framsóknarflokksins, Samfylkingarinnar, Pírata og Viðreisn eru hafnar. Þetta kom fram á blaðamannafundi sem flokkarnir fjórir blésu til í Grósku rétt fyrir hádegið.
Einar Þorsteinsson, oddviti Framsóknarflokksins, opnaði fundinn og lýsti yfir ánægju með að formlegar viðræður væru hafnar. Hann sagðist hafa átt góð samtöl við aðra oddvita síðustu daga og að línur væru farnar að skýrast. Aðrir oddvitar flokkanna tóku undir orð Einars og fögnuðu því að formlegar viðræður væru að hæfast.
Fram kom á fundinum að fyrst yrði málefnasamstarfið rætt og síðan farið í að ákveða hverjir myndu fá æðstu embætti innan borgarkerfisins í sinn hlut. Þegar hópurinn var spurður hvort að engar áhyggjur væru af því að viðræðurnar gætu strandað á lokametrunum tók Einar til máls og sagðist fullviss um að lending myndi nást varðandi þau mál. Það væri einfaldlega verkefni þessara fjögurra flokka að mynda meirihluta.
Einar vék sér undan spurningum um borgarstjórastólinn og hvort að hann hefði næga reynslu til að bera til þess að valda því starfi. Sagði hann að Framsóknarflokkurinn legði áherslu á málefnin í komandi viðræðum.
Dagur B. Eggertsson, borgarstjóri og oddviti Samfylkingarinnar, var á sömu línu og sagðist ekki hafa sett neina úrslitakosti um að hann yrði borgarstjóri. Hann ítrekaði að fyrst verði rætt um málefnin og verkaskipting verði rædd í lokin.