Hið mjög svo vinsæla morgunkorn, Cocoa Puffs, sem hvarf af íslenskum markaði í ársbyrjun 2021, fer að birtast aftur í verslunum á næstu dögum en fyrsta sendingin hefur nú þegar borist til landsins. Þetta kemur fram í tilkynningu frá Nathan & Olsen, umboðsaðila General Mills hér á landi.
Uppskriftin hefur verið aðlöguð þannig að hún samræmist evrópulöggjöf sem gildir á Evrópska efnahagssvæðinu. Sú breyting gerir það að verkum að við fáum loksins Cocoa Puffs aftur til Íslands og landsmenn fá aftur þetta vinsæla morgunkorn með minna sykur- og fituinnhaldi og meira próteini.
„Við teljum að framleiðanda hafi tekist mjög vel til og við erum mjög ánægð með að geta boðið landsmönnum aftur upp á hið frábæra vörumerki Cocoa Puffs líkt og við höfum gert undanfarna áratugi,“ segir Ari Fenger eigandi Nathan & Olsen.
