Eftir að heimsfaraldri kórónuveirunnar lauk og hjól hagkerfisins fóru að snúast á nýjan leik hafa innlán heimilanna aukist verulega. En nú hefur sá viðsnúningur orðið að yfirdráttarlán eru farin að aukast á nýjan leik eftir að heimilin höfðu greitt þau niður jafnt og þétt.

Fréttablaðið skýrir frá þessu í dag og segir að þetta komi fram í Hagvísum Seðlabankans.

Hefur blaðið eftir Vigni Þór Sverrissyni, fjárfestingastjóra hjá Íslandssjóðum, að þetta geti verið vísbending um að hluti heimilanna geti átt í vandræðum með að láta enda ná saman. Það muni skýrast betur í vetur.

Um áramótin voru yfirdráttarlán heimilanna 2,59% af landsframleiðslu en eru nú orðin 2,63%. Landsframleiðslan hefur aukist á þessum tíma.

Ekki er vitað hvernig þetta skiptist niður á heimilin en Fréttablaðið segir að ekki sé óvarlegt að ætla að yfirdráttarlánin séu almennt frekar lág og hið hækkaða hlutfall bendi til að heimilum, sem taka yfirdráttarlán, hafi fjölgað á árinu.

Hægt er að lesa nánar um málið í Fréttablaðinu í dag.