Sigmar Guðmundsson, þingmaður Viðreisnar, hjólaði af nokkurri hörku í tólf þingmenn Sjálfstæðisflokksins en af þeim eru þrír ráðherrar. Orðin lét hann falla í umræðum um munnlega skýrslu Willums Þórs Þórssonar, heilbrigðisráðherra, um stöðuna á Covid-19 faraldrinum hér á landi.
Vísaði Sigmar í ræðu sinni til þess að sagt hafi verið frá því í fréttum að tólf af sautján þingmönnum flokksins efist um réttmæti strangra takmarkana á daglegu lífi fólks í nafni sóttvarna. Þrír af þeim, sagði Sigmar, eru ráðherrar. Sigmar nefndi engin nöfn, en þar átti hann án efa við þær Áslaugu Örnu Sigurbjörnsdóttur og Þórdísi Kolbrúnu Reykfjörð Gylfadóttur, hið minnsta, en báðar tvær hafa látið efasemdir sínar í ljós opinberlega og ítrekað.
„Við heyrum þessa þingmenn ítrekað tala gegn ákvörðunum eigin ríkisstjórnar. Þeir tala og tala en gera svo ekki neitt. Þessir tólf þingmenn, og þar af þrír ráðherrar, hafa raunverulega völd í þessum málum en þeir kjósa að beita því ekki, hvorki við ríkisstjórnarborðið né sem þingflokkur. Þeir tala fallega og af innlifun um frelsi og mannréttindi og benda ítrekað á allsvakalegar afleiðingar harðra sóttvarnaráðstafana, félagslegar og andlegar afleiðingar, og tugmilljarða útgjöld ríkissjóðs. En það er ekki nóg að vera svalur á Twitter. Að standa bara með frelsinu í orði en ekki í athöfnum er hræsni,“ sagði Sigmar í ræðu sinni á Alþingi.
Nýr heilbrigðisráðherra, Willum Þór Þórsson, varði gildandi takmarkanir og sagði þær nauðsynlegar, enda myndi heilbrigðiskerfið ekki ráða við stöðuna öðruvísi.