Snorri Ásmundsson, listamaður og oddviti Kattaframboðsins, er stoltur af framboðinu þrátt fyrir að það hafi ekki náð manni inn á Akureyri. Þá segist hann vera þakklátur öllum sem komu að því.
Þetta segir Snorri í færslu sem hann birti á Facebook-síðu sinni í dag. Hann óskar jafnframt sigurvegurum kosninganna til hamingju. „Við áttum okkar sigra og getum verið ánægð. Niðurstaða Kosninga eru skýr skilaboð því meirihlutinn ræður, því miður,“ segir hann.
„Akureyringar eru ekki tilbúnir í breytingar og líklega er almættið að segja mér að þetta sé ekki minn starfsgrundvöllur. Ég slepp við að vera fastur á Akureyri næstu fjögur árin og frelsið er yndislegt.“
Snorri segist vera þakklátur og hamingjusamur fyrir sitt hlutskipti og að viðhorf hans séu ávallt lituð af þakklæti.
„Takk frambjóðendur og kjósendur kattaframboðsins þið eruð blessuð og tilbúin í ævintýri og ykkar bíður góðir tímar. Þið hin eigið vonandi eftir að sjá eftir að hafa ekki kosið kattaframboðið og frelsið. En vonandi endurskoðar ný bæjarstjórn bannið við lausagöngu katta og ég óska þeim þá velfarnaðar. Guð blessi Akureyringa.“
Eins og fyrr segir fékk Kattaframboðið ekki nógu mikið kjör til að ná inn fulltrúa í bæjarstjórnina en flokkurinn fékk alls 4,1% í kosningunum. Flesta fulltrúa fékk Bæjarlistinn eða þrjá á meðan Framsóknarflokkurinn og Sjálfstæðisflokkurinn fá tvo hvor. Þá fengu Samfylkingin, Flokkur fólksins og Miðflokkurinn einn fulltrúa á mann.
Hér fyrir neðan má sjá niðurstöður kosninganna á Akureyri:
