Sky News skýrir frá þessu. Fram kemur að Blinken hafi gert Rússum ljóst að hann mæti ekki til fundarins ef Rússar ráðast á Úkraínu.
Unnið er að því hörðum höndum að koma í veg fyrir að Rússar ráðist á Úkraínu en sérfræðingar telja þá búna að koma sér upp nægilega miklu herliði við úkraínsku landamærin til að geta gert innrás á hverri stundu.
Rússar hafa krafist ákveðinna öryggistrygginga frá Vesturlöndum. Þeir vilja að NATO lýsi því yfir að Úkraína fái aldrei að ganga í varnarbandalagið. Þetta vilja Vesturlönd ekki fallast á og benda á að Úkraína sé fullvalda ríki sem ráði sjálft för hvað þetta varðar. Það eina sem Vesturlönd vilja ræða um við Rússa eru takmarkanir á vopnabúnaði og hvernig sé hægt að byggja upp samband á milli deiluaðila.
Ráðamenn í Kreml segja ótta Vesturlanda við innrás í Úkraínu jaðra við móðursýki en Vesturlönd standa fast á sínu og í gær sagði Joe Biden, Bandaríkjaforseti, að Rússar gætu nú verið að reyna að finna átyllu til innrásar. Hann sagði ástæðu til að ætla að þeir væru nú að sviðsetja atburðarás sem veiti þeim átyllu til innrásar.
Blinken tók undir þessi orð Biden og sagði að hér gæti til dæmis verið um svokallaða hryðjuverkaárás að ræða í Rússlandi þar sem sprengja verður sprengd, þeir segist hafa fundið fjöldagröf, sviðsetji árás með drónum á almenna borgara eða sviðsetji árás með efnavopnum þar sem þeir beiti í raun efnavopnum. Hann sagði einnig að þeir muni þá hugsanlega segja að um þjóðarmorð sé að ræða.
