Lögreglustjórinn á Vesturlandi bauð fimmmenningunum í yfirkjörstjórn Norðvesturkjördæmis að greiða sekt til að ljúka máli varðandi meint brot kjörstjórnarinnar við meðferð kjörgagna í Alþingiskosningunum. Enginn hefur greitt sektina og því stefnir í að málið fari fyrir dóm.

Fréttablaðið skýrir frá þessu í dag. Fram kemur að Inga Tryggvasyni, formanni yfirkjörstjórnar og héraðsdómara, hafi verið gert að greiða 250.000 króna sekt en hinum meðlimum kjörstjórnarinnar hafi verið gert að greiða 150.000 króna sekt. Blaðið segir að sektirnar hafi ekki verið greiddar og frekari frestur verði ekki veittur og stutt sé í að ákærur verði gefnar út. Gunnar Örn Jónsson, lögreglustjóri á Vesturlandi, gat ekki tjáð sig um málið á þessu stigi.

Ingi Tryggvason sagðist ekki hafa greitt sektina því hann telji að hann eigi ekki að greiða hana. Hann sagðist ekki óttast væntanlega saksókn og muni sætta sig við niðurstöðuna, hver sem hún verður.