Bæði Norðmenn og Svíar hafa að undanförnu styrkt varnir sínar vegna þess sem þeir telja vera vaxandi ógn sem löndunum stafar af frá Rússlandi. Bæði löndin telja að þeim stafi meiri ógn en áður af Rússlandi og tengja það við málefni Úkraínu en Rússar hafa safnað miklu herliði við úkraínsku landamærin og telja margir að þeir ætli að ráðast inn í landið.

Um miðjan mars hefst stærsta heræfingin, síðan kalda stríðinu lauk, norðan heimskautsbaugs en þá munu 35.000 hermenn frá 28 NATO-ríkjum æfa hvernig NATO mun koma Norðmönnum til aðstoðar ef á þá verður ráðist og dylst fáum að þar er átt við rússneska árás. Æfingin heitir „Operation Cold Respons“ og mun að mestu snúast um aðgerðir úr lofti og á sjó.

Jótlandspósturinn segir að Bandaríkin og Bretland sendi flugmóðurskip til  æfingarinnar auk tilheyrandi flotadeilda. Bandaríska flugmóðurskipið USS Harry S. Truman tekur stefnuna til Noregs um miðjan febrúar til að taka þátt í æfingunni en skipið er nú í austanverðu Miðjarðarhafi vegna stöðunnar í Úkraínu.

Æfingin hefur verið lengi í undirbúningi og er ekki bein afleiðing af spennunni á úkraínsku landamærunum.

Svíar eru ekki aðilar að NATO en eiga í margvíslegu samstarfi við bandalagið. Hin aukna ágengni Rússa í nærumhverfi sínu virðist vera að ýta Svíum nær aðild að NATO en þar í landi eru margir, sem hafa verið mótfallnir aðild, farnir að ræða opinskátt um að hugsanlega þurfi Svíar að sækja um aðild að bandalaginu.