Nýtt stafrænt markaðstorg með íslenskar vörur hefur nú verið sett í loftið á vefsíðunni buyicelandic.com. Markmiðið er að uppfylla þörf erlendra viðskipta sem vilja kaupa íslenskar vörur, hönnun eða framleiðslu. Þetta kemur fram í fréttatilkynningu sem send var á fjölmiðla.
„Markaðstorgið mun einblína eingöngu á íslenskar vörur og leggja áherslu á að ná til erlendra viðskiptavina. Nú getum við boðið þeim, sem selja íslenskar vörur, vettvang til að opna sína eigin netverslun inná markaðstorginu með lítilli fyrirhöfn eða áhættu og nýta sameiginlega markaðssetningu á þeirri öflugu ímynd sem íslenskar vörur hafa. Við teljum okkur vera að uppfylla brýna þörf fyrir íslensk fyrirtæki,“ segir Arnar Björnsson, framkvæmdastjóri Stafræns Markaðstorgs ehf. sem stendur að verkefninu.
Að sögn Arnars geta seljendur stækkað markaðssvæði sitt og nýtt tímann sinn og fjármagn í frekari þróun og framleiðslu meðan Stafræn Markaðstorg ehf. sjá um markaðsmálin og kerfisþróun.
„Horft er til þess að þannig geta seljendur, hvort sem það eru íslenskar snyrtivörur, fatnaður, hönnun, handverk eða annað íslenskt, náð frekari sókn erlendis í krafti fjöldans og um leið að draga úr kostnaði sem snýr t.a.m. að markaðssetningu, kerfisþróun eða sendingum erlendis.“
Ein af þeim nýjungum sem seljendur og viðskiptavinir munu taka eftir eru að geta fengið safnsendingar sem dregur töluvert úr flutningskostnaði.
„Safnsendingarnar virka þannig að viðskiptavinur getur sett í körfu vörur frá þremur mismunandi seljendum og fengið allar vörurnar afhendar saman. Með þessu er dregið úr heildar sendingarkostnaði, sem einna helst stendur seljendum fyrir þrifum ásamt betri notendaupplifun viðskiptavina.“
Stafræn markaðstorg er sú tegund verslunar sem vex hvað hraðast í heiminum að sögn Arnars. Árið 2020 áttu markaðstorg um 20% af allri netsölu í heiminum og er áætlað að það hlutfall verði komið upp í 25% árið 2025.
„Kostir markaðstorga fram yfir hefðbundnar vefverslanir er ekki síst að seljendur eru ekki að selja vörur sínar í heildsölu, heldur fá fullt verð og greiða eingöngu þóknun fyrir hverja selda vöru. Sú þóknun fer svo í sameiginlegan pott sem er nýttur fyrir rekstur á markaðstorginu og þá sérstaklega markaðssetningu til þeirra erlendu markhópa sem eru líklegir viðskiptavinir til að auka umferð á vefnum.“
Að mati Arnars er því hér komin leið fyrir íslenska seljendur að stækka markaðssvæði sitt umtalsvert og því kjörið tækifæri fyrir frumkvöðla og litla og meðalstóra seljendur til efla rekstur sinn enn frekar. Þá hafa stærri seljendur enn eina leiðina til að auka sína sölu.
„Fyrir mitt fyrirtæki, Cintamani, er þetta frábær þjónusta til að koma vörum okkar á framfæri erlendis. Við komumst hjá því að fjölga starfsgildum til að viðhalda erlendri vefverslun, halda úti markaðsstarfi erlendis og reka flókna vefverslun sem uppfyllir gæðastaðla til að standast samkeppni erlendis. BuyIcelandic.com er því fullkomin lausn fyrir okkur og erum gríðarlega ánægð með afrakstur þeirra í Stafrænum Markaðstorgum með þeirra sýn, lausn og þjónustu. Hvetjum við sem flesta til að koma sínum vörum á framfæri inn á markaðstorgið því það þýðir að meira úrval laðar að fleiri viðskiptavini sem þýðir að þeir sjá úrval af öðrum vörum sem þeir gætu bætt í sína körfu.“ Segir Einar Karl Birgisson, framkvæmdastjóri Cintamani.
„Sem lítill seljandi á Íslandi, en lifi af með mína framleiðslu, opnast nú gríðarlega stórt tækifæri á að koma mínum vörum á framfæri erlendis. Það er engin kostnaður að sækja um að gerast seljandi og opna sína búð inn á BuyIcelandic.com. Tekin er þóknun, 15%, af hverri seldri körfu sem þýðir að ég fæ 85% af hverri sölu í stað þess að selja vörur mínar í heildsölu og fengi þá kannski 50% af hverri vöru. 15% fara svo í markaðskostnað og rekstur á kerfinu sem mér þykir mjög sanngjarnt,“ segir Heiðrún Ósk Níelsdóttir, eigandi HN Gallery.