Allir framhaldsskólar bjóða nú upp á gjaldfrjálsar tíðavörur og slíkar vörur standa rúmlega 80% grunnskólanema ókeypis til boða í skóla og félagsmiðstöðvum. Þetta kemur fram í svari menntamálaráðherra við fyrirspurn Andrésar Inga Jónssonar, þingmanns Pírata.
Andrés Ingi fagnar þessum tíðindum á Facebooksíðu sinni þar sem hann segir:
„Hér sést svart á hvítu hvað grasrótarhreyfing ungmenna skilaði miklum árangri í að koma þessu á dagskrá. Það má sérstaklega nefna tvær stúlkur í Langholtsskóla, Önnu Maríu Allawawi Sonde og Sögu Maríu Sæþórsdóttur, sem sendu inn umsögn við fjárlagafrumvarp fyrir ári og náðu þannig beint til þingheims. Vel gert!
Þó að naumur meirihluti þings hafi fellt tillögu mína um gjaldfrjálsar tíðavörur á síðasta ári, þá fór þessi þróun á fullt flug. Núna þarf bara að klára verkið og tryggja að þessar vörur séu aðgengilegar gjaldfrjálst til 100% fólks á grunnskólaaldri!“
Lilja Alfreðsdóttir, menntamálaráðherra, sendi skólameisturum allra framhaldsskóla bréf 2. mars 2021 og beindi því til skólanna að sjá til þess að tíðavörur yrðu aðgengilegar og gjaldfrjálsar fyrir nemendur framhaldsskóla fyrir lok síðasta skólaárs. Taldi ráðherra það bæði sanngjarnt og réttlátt að aðgengi að tíðavörum væri gjaldfrjálst í skólakerfinu. Allnokkrir framhaldsskólar hafa boðið upp á gjaldfrjálsar tíðavörur í nokkur ár en aðrir brugðust við bréfi ráðherra frá því í vor og bjóða allir þessar vörur gjaldfrjálsar frá og með skólaárinu 2021–2022.
Í svarinu til Andrésar Inga segir að ráðuneytið hafi aflað sér upplýsinga hjá Sambandi íslenskra sveitarfélaga um hvaða sveitarfélög bjóða upp á gjaldfrjálsar tíðavörur. Sambandið sendi út könnun til allra sveitarfélaga þar sem óskað var eftir upplýsingum um hvort boðið væri upp á gjaldfrjálsar tíðavörur í grunnskólum og félagsmiðstöðvum eða hvort það væri í vinnslu. Góð svörun var í könnuninni en þau sveitarfélög sem svöruðu ná yfir u.þ.b. 96% landsmanna. Þá áréttar ráðuneytið er að árétta að ekki er um lagaskyldu fyrir sveitarfélög og ræða heldur byggist ákvörðun á stefnu viðkomandi sveitarfélaga.
Tengdar fréttir:
Betra að vera á túr í grunnskólum Reykjavíkur frá og með næsta hausti
Vilja ókeypis tíðavörur í MH – „Það þarf í rauninni að borga fyrir að vera kona“