fbpx
Laugardagur 16.október 2021
Eyjan

Alma svarar Bjarna og segir honum að opna augun – „Þeir gætu allt eins gefið okkur puttann“

Máni Snær Þorláksson
Föstudaginn 17. september 2021 18:15

Samsett mynd - Til vinstri: Alma Björk/Mynd: Stefán - Til hægri: Bjarni Ben/Mynd: Anton Brink

Ekki missa af Helstu tíðindum dagsins í pósthólfið þitt

Lesa nánar

„Hver vill sjá fólk í ríkisstjórn sem lítur í hina áttina þegar fólkið í landinu bendir á vanrækslu eða ofbeldi á börnum, sjúklingum, fötluðum og eldra fólki?“

Svona hefst pistill sem laganeminn Alma Björk Ástþórsdóttir skrifar en pistillinn birtist á Vísi. Pistil Ölmu má túlka sem nokkurs konar svar við pistli eftir Bjarna Benediktsson fjármálaráðherra en sá pistill var einnig birtur á Vísi. DV fjallaði um pistil Bjarna fyrr í dag en þar fór hann yfir þá þrjá hluti sem honum finnst komandi kosningar snúast um.

Lesa meira: Bjarni segir að kosningarnar snúist um þessi þrjú mál

Ljóst er að Alma er ósammála Bjarna um hvað kosningarnar snúast. „Fyrir utan biðlistana munu kosningarnar snúast um allt annað og meira en það sem þú nefnir í pistli þínum. Í grunninn munu þessar kosningar snúast um viðhorf. Viðhorf stjórnmálamanna til almennings í landinu,“ segir Alma.

Alma segir þá að síðustu vikur og mánuði hafi komið fram skelfilegar sögur, bæði úr heilbrigðiskerfinu og menntakerfinu. Hún vísar þá í nafnlausa færslu úr Facebook-hópnum Sagan okkar en í færslunni fer foreldri yfir hvernig menntakerfið hefur brugðist sér og syni sínum.

„Á meðan heilbrigðiskerfið hefur fengið ágætis athygli stjórnmálamanna þá er enginn áhugi meðal manna að ræða menntakerfið. Hvers vegna? Er erfitt að horfast í augu við sannleikann?“

Þá skorar hún á Bjarna að ræða um þessi mál. „Sýndu að þú sért stjórnmálamaður sem hefur bein í nefinu til þess að ræða vanlíðan barna í skólakerfinu,“ segir hún.

Gætu allt eins gefið þeim puttann

Alma bendir á að stór hópur fólks standi í strangri baráttu við menntakerfið alla daga. „Það er skólaskylda og við sem eigum börn komumst ekki hjá því að eiga við þetta kerfi, ekki frekar en að sjúklingar komist hjá því að eiga við heilbrigðiskerfið,“ segir hún.

„Þegar þú þarft að berjast með kjafti og klóm fyrir grunnþörfum barnsins þíns þá get ég lofað þér því að hugurinn leitar síst í innlend orkumál.

Á meðan þú þarft að hlusta á starfsfólk skóla segja að ekki sé til fjármagn til þess að mæta þörfum barnsins þíns, eða að þú þurfir að bíða í margar vikur og mánuði eftir lífsnauðsynlegri aðgerð og mikilvægum rannsóknarniðurstöðum, þá get ég lofað þér því að lægri skattar eru það síðasta sem þú hugsar um. Þá er þér nákvæmlega sama hvort þú greiðir 36, 40 eða 42 prósent í skatta.

Bara að þú fáir nauðsynlega þjónustu. Þetta snýst allt um grunnþarfir, vellíðan, heilbrigði og almenna skynsemi. Það er í hnotskurn það sem þessar kosningar snúast um, við skulum hafa það á hreinu.“

Að lokum segir hún að það boði ekki gott að stjórnmálamenn hunsi vandann. „Þeir gætu allt eins gefið okkur puttann og það er ekki það viðhorf sem við þurfum á að halda í samfélaginu.“

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Pennar

Mest lesið

Nýlegt