Í dag gagnrýndu samtök namibískra fjölmiðlamanna framferði Samherja gegn RÚV og Helga Seljan. Þetta var gert í tilefni alþjóðlegs dags fjölmiðlafrelsis.

Brynjar Níelsson, þingmaður Sjálfstæðisflokksins, vill meina að allir sem gagnrýna aðför Samherja séu að berjast gegn tjáningarfrelsinu.

„Nú hafa samtök namibískra fréttamanna lýst yfir samstöðu með íslenskum fréttamönnum og fordæma framgöngu Samherja gagnvart fréttamönnum. Verð nú að hrósa þeim á RUV fyrir góða kímnigáfu og frábært skopskyn með því að fá þá í Namíbíu í lið með sér. Gott að vita að það er ekki bara nýkjörin stjórn blaðamannafélags Íslands sem er farin að berjast gegn tjáningarfrelsinu,“ skrifar Brynjar en í gær sendi Blaðamannafélag Íslands frá sér tilkynningu þar sem lýst var yfir óánægju með auglýsingar Samherja, en einnig að þær birtust á mbl.is.

Í dag var síðan norski bankinn DNB dæmdur til að greiða himinháa sekt fyrir lélega framfylgd laga um eftirlit með peningaþvætti. Samherji var viðskiptavinur bankans og var bankinn sérstaklega gagnrýndur fyrir viðskipti fyrirtækja í eigu Samherja.

„Svo sé ég að fréttamenn og stjörnulögmaðurinn eini sanni hafa tekið saman höndum um að láta úrskurð norska fjármálaeftirlitsins um sekt á norska bankann DNB líta út sem áfellisdóm á Samherja,“ skrifar Brynjar.

Hann vill meina að dómurinn hafi ekkert með sök eða sakleysi Samherja að gera. 

„Þetta mál snýst bara um að bankinn hafi ekki í verkferlum sínum fylgt að fullu norskum lögum um eftirlit með peningaþvætti. Þessi svokallaði sendiboði í Efstaleitinu er löngu hættur að vera sendiboði hafi hann einhvern tíma verið það,“ segir Brynjar að lokum.