Ummæli Dóru Bjartar Guðjónsdóttur, borgarfulltrúa Pírata, um Sjálfstæðisflokkinn, á fundi borgarstjórnar í fyrradag, þar sem nýbirtur ársreikningur borgarinnar var kynntur, hafa vakið mikla athygli og harða gagnrýni sumstaðar. Dóra Björt sagði:
„Ég vil leggja áherslu á og undirstrika að Sjálfstæðisflokknum er ekki treystandi fyrir styrkri fjármálastjórn, hvorki hér né annars staðar. Hans helsta áróðursmarkmið er að láta fólk trúa því að hann sé ofboðslega ábyrgur þegar kemur að fjármálum en hann er það ekki,“ sagði Dóra og sagði ennfremur: „Sjálfstæðisflokkurinn og hans stjórnun er ekki ábyrg, ekki heiðarleg og ekki góð.”
Meðal þeirra sem andmæltu þessum málflutningi var Kolbrún Baldursdóttir, borgarfulltrúi Flokks fólksins. Hún fór yfir málið í stuttri Facebook-færslu í gær:
„Enda þótt ég ætli ekki að gerast neinn sérstakur verndari borgarfulltrúa Sjálfstæðisflokks þá er það innbyggt í mig að koma þeim til varnar sem sparkað er í. Heift meirihlutans í garð borgarfulltrúa Sjálfstæðismanna í borgarstjórn birtist í myndum sem stríða langt umfram siðareglur sem meirihlutinn setti sjálfum sér. En svona hatur og heift sem borgarfulltrúinn og Píratinn Dóra Björt sýndi í garð borgarfulltrúa Sjálfstæðisflokks í dag á fundi sem ræða átti Ársreikning borgarinnar 2020 hlýtur að éta manneskju upp að innan. Ég gat ekki orða bundist.“
Farið er yfir málið í Staksteinum Morgunblaðsins í dag og Dóra sökuð um smekkleysi:
„Smekkleysan á sér fá takmörk í borgarstjórn Reykjavíkur. Á þriðjudag var í borgarstjórn rætt um fjármál borgarinnar. Fulltrúum meirihlutans líður illa í slíkri umræðu, þar sem þeir hafa árum saman safnað skuldum eins og enginn sé morgundagurinn. Það réttlætir þó ekki orð sem féllu á fundinum.
Sjálfstæðismenn í borgarstjórn hafa gagnrýnt þessa óráðsíðu og á fyrrnefndum fundi greip Dóra Björt Guðjónsdóttir pírati til þess að hella úr skálum reiði sinnar yfir þennan stjórnmálaflokk og sagði hann óábyrgan og skaðlegan, þröngsýnan og gamaldags. Svo bætti hún um betur og fullyrti: „Sjálfstæðisflokkurinn er í raun kýli á samfélaginu. Hann er hreint og beint hættulegur samfélaginu.“
Þarna er borgarfulltrúinn að tala um þann flokk sem hefur langmestan stuðning allra flokka á landinu og hefur innan vébanda sinna tugþúsundir landsmanna. Það er kýlið, að mati borgarfulltrúans, því að flokkurinn er ekkert annað en flokksmennirnir.“
Morgunblaðið segir að forseti borgarstjórnar hefði átt að grípa hér inn í.