Fulltrúaráð Sjálfstæðisflokksins í Reykjavík, Vörður, samþykkti í kvöld á fundi sínum að halda sameiginlegt prófkjör fyrir Reykjavíkurkjördæmi norður og suður helgina 5. og 6. júní.
Verður prófkjörið haldið með hefðbundnum hætti þrátt fyrir Covid-19 faraldurinn en þó verður kjörstöðum fjölgað til þess að dreifa álaginu á kjördögunum.
Viðbúið er að tekist verði á um fyrsta sætið í prófkjörinu. Þykir það ljóst að Guðlaugur Þór Þórðarson utanríkisráðherra og Áslaug Arna Sigurbjörnsdóttir dómsmálaráðherra munu takast á. Þá er ljóst að Sigríður Á. Andersen, Brynjar Níelsson og Birgir Ármannsson vilja halda sínum sætum ofarlega á listum flokksins.
Áslaug kom inn á þing 2016 og hefur verið ráðherra dómsmála síðan 2019. Áslaug vermdi annað sæti framboðslista Sjálfstæðisflokksins í kosningunum 2017 í Reykjavík norður, á eftir Guðlaugi Þór.
