Gísli Marteinn er einn helsti talsmaður þess að lækka hámarkshraða innan Reykjavíkur og hefur þá sérstaklega beint sjónum sínum að Vesturbænum og götunni sem hann býr við. Hann hefur látið skoðun sína flakka á Facebook og Twitter seinustu daga og er ekki hræddur við að láta sinn gamla flokk, Sjálfstæðisflokkinn, heyra það fyrir að vera á móti hugmyndinni.

Vigdís Hauksdóttir, borgarfulltrúi Miðflokksins, telur Gísla vera að brjóta siðareglur RÚV með skrifum sínum en samkvæmt þriðju grein þeirra þá má starfsfólk ekki taka þátt í pólitískri umræðu á samfélagsmiðlum. Í þeim segir meðal annars:

„Starfsfólk, sem sinnir umfjöllun um fréttir, fréttatengt efni og dagskrárgerð, tekur ekki opinberlega afstöðu í umræðu um pólitísk málefni eða umdeild mál í þjóðfélagsumræðunni, þar á meðal á samfélagsmiðlum.“

https://www.facebook.com/vigdishauks/posts/10159357507911473

Í samtali við DV segir Gísli að þegar hann hóf störf hjá RÚV var hann að koma beint úr pólitíkinni og voru hann og stjórnendur RÚV sammála um það að skyldi ekki skrifa undir þessar siðareglur þar sem hann þyrfti að geta tjáð sig um samfélagsmál og að það væri æskilegt fyrir báða aðila.

Gísli telur hins vegar umræðu um lækkun hámarkshraða á götu sem hann býr við ekki vera pólitíska umræðu. Því geti umræðan sem hann hefur flutt ekki talist vera brot á siðareglunum og því fellur málflutningur Vigdísar um sig sjálfan, þrátt fyrir að Gísli hafi aldrei skrifað undir téðar reglur.

„Ég er að tjá mig um umferðarhraða í götunni fyrir utan hjá mér. Ég tel að ef starfsmenn RÚV mega ekki lengur taka þátt í foreldrafélagi Melaskóla eða megi ekki lengur berjast fyrir því að hámarkshraði í götunni þeirra sé lækkaður, þá eru menn komnir á ansi miklar villigötur,“ segir Gísli en honum var verulega heitt í hamsi á meðan hann ræddi þetta. Hann segir marga fjölmiðlamenn hafa misskilið umræðuna og vísar þessum ásökunum á bug.