Helga Vala Helgadóttir, þingkona Samfylkingarinnar, er ansi ósátt með stjórnarflokkana miðað við færslu sem hún birti á Facebook-síðu sinni í dag. Þar ræðir hún um ákvörðun þeirra um að leggja niður Nýsköpunarmiðstöð Íslands og leggja niður embætti skattrannsóknarstjóra.
„Í dag samþykktu stjórnarflokkarnir allir sem einn að leggja niður Nýsköpunarmiðstöð Íslands, án þess að hafa undirbúið hvað taka eigi við. En það var ekki nóg, heldur samþykktu stjórnarliðar líka að leggja niður embætti skattrannsóknarstjóra og færa rannsóknir inn í deild hjá ríkisskattstjóra sem, eins og skattrannsóknarstjóri benti á í umsögn sinni, mun draga úr mætti til skattrannsókna.“
Í færslu sinni segir Helga að hún hafi auðveldlega trúað Sjálfstæðisflokknum til þessara verka, en að stuðningur Vinstri grænna komi henni á óvart. Hún tekur þó fram að henni þykir mótstaðan ekki hafa verið mikil hjá Vinstri grænum, og því viti hún í raun ekki hvers vegna hún sé hissa.
„Ég hefði alla daga trúað Sjálfstæðisflokknum til slíkra verka en er ögn hissa yfir eindregnum stuðningi VG fólks… en mótstaðan þar er nú ekki mikil yfirleitt þessi dægrin svo ég veit ekki af hverju ég er hissa.“
