Miðstjórn Alþýðusambands Íslands leggst gegn ráðgerðri opnun landamæra 1. maí gagnvart ferðamönnum, bólusettum við Covid-19, utan Schengen-svæðisins. Þess skal getið að bólusettir ferðamenn innan Evrópusambandsins hafa hingað til ekki þurft að fara í sóttkví við komu hingað til landsins. Með því að opna á bólusetta ferðamenn utan Schengen aukast möguleikar á að fjölga á ný ferðamönnum frá Bandaríkjunum og Bretlandi.

Ályktun ASÍ er eftirfarandi:

„Miðstjórn Alþýðusambands Íslands varar við áformum um opnari landamæri meðan bólusetningar hafa ekki náð þeim markmiðum sem að er stefnt. Ávinningurinn af þeim áformum er óljós. Horfa ber til þess að smit eru enn afar útbreidd í fjölmörgum löndum heims og þar á meðal eru nýrri afbrigði af veirunni sem enn er takmörkuð þekking á. Það er til mikils að vinna fyrir samfélagið á Íslandi að fólk sé frjálst ferða sinna innanlands í sumar og geti notið sumarleyfa og samvista án hertra aðgerða. Hætt er við að ferðaþjónustan og tengdar greinar geti borið meiri skaða af en ella ef opnunin verður til þess að grípa þurfi til harðari sóttvarnaraðgerða innalands.“