Gunnar Smári Egilsson, formaður framkvæmdastjórnar Sósíalistaflokksins, ráðleggur Sjálfstæðismönnum að „þegja á jólunum“ í færslu sem hann birti í Facebook-hóp Sósíalistaflokksins í dag.
Tilefni skrifa Gunnars var áramótapistill Þórdísar Kolbrúnar Reykfjörð Gylfadóttur, utanríkis- og þróunarsamvinnuráðherra þar sem hún segir það óforsvaranlegt að áfram verði mannréttindi og athafnafrelsi Íslendinga takmarkað í nafni sóttvarna.
Gunnar skrifar: Hér kennir varaformaður flokksins öllum öðrum um ástandið sem rekja má til langvarandi sveltistefnu Sjálfstæðisflokksins, sem hefur valdið því að á Íslandi eru færri gjörgæslupláss á íbúa en í nokkru landi í nágrenni við okkur og við því þurft að þola meiri takmarkanir í daglegu lífi.“
Sjá einnig: Þórdís segir nei – „Svarið getur ekki verið annað“
Gunnar segir Sjálfstæðisfólk láta sem þeim sé annt um einstaklingsfrelsið en í reynd sé það sjálft „boðberi kúgunar“.
„Varaformaður flokks, sem hefur það að stefnu sinni að halda sem flestum undir fátæktarmörkum, halda sem flestum án heimilis og tryggja að sem flest heimili geti ekki haldið hátíðleg jól, lætur eins og sér sé annt um einstaklingsfrelsi; sjálfur boðberi kúgunar, ójöfnuðar og óréttlætis.“
Því ráðleggur Gunnar Smári Sjálfstæðisfólki að hafa sigt hægt í umræðunni.
„Mitt ráð til Sjálfstæðisflokksfólks er að þegja á jólunum. Boðskapur þess á betur heima á hrekkjavökunni, fyrsta vetrardag eða föstudaginn langa, einhverjum degi sem minnir á myrkur, dauða, grimmd og þegar vonin er dauf og slökknuð.“
