Ólína Kjerúlf Þorvarðardóttir, fyrrverandi Alþingiskona, rithöfundur og þjóðfræðingur, var meðal gesta í Silfrinu í gær. Þar hélt hún því fram að kísilmálverksmiðju á Bakka við Húsavík hafi verið lokað.

Framkvæmdir við kísilverið PCC BakkiSilicon hf. hófust árið 2015 eftir nokkra ára undirbúning en árið 2020, rétt rúmum tveimur árum eftir að verksmiðjan hóf starfsemi, var greint frá því að um 80 starfsmönnum hafi verið sagt upp vegna tímabundinnar rekstrarstöðvunar. Hins vegar hófst starfsemin aftur á þessu ári.

Ólína hefur nú leiðrétt þessa rangfærslu í færslu á Facebook:

„Mér varð aðeins á í Silfrinu í gær þegar ég sagðist halda að iðnaðarverinu á Húsavík hefði verið lokað. Ég stóð í þeirri trú eftir rekstrarstöðvun fyrirtækisins í fyrra. Svo mun þó ekki vera og er mér bæði ljúft og skylt að leiðrétt aþennan misskilning minn. Enginn leiðrétti mig í þættinum enda held ég að tíðar fréttir af rekstrarerfiðleikum, uppsögnum og tímabundinni lokun hafi ruglað marga í ríminu.“