Hörður J. Oddfríðarson hélt naumlega velli sem formaður fulltrúaráðs Samfylkingarinnar í Reykjavík eftir óvænt mótframboð. Aðalfundur fulltrúaráðsins fór fram í kvöld og vakti það talsverða athygli þegar Ásta Helgadóttir, fyrrverandi þingmaður Pírata, lýsti því yfir að hún hyggðist bjóða sig fram til formanns gegn Herði.

Segja þeir sem til þekkja innan flokksins að framboð Ástu megi rekja til gríðarlegrar óánægju með störf Harðar sem formanns uppstillinganefndar Samfylkingarinnar í Reykjavík fyrir síðustu Alþingiskosningar.

Uppstillingin þótti vera algjört klúður og var uppstillinganefndin sökuð um ógegnsæi og ófagleg vinnubrögð. Svo fór að margir nýliðar, sem höfðu ekki verið virkir í innra starfi flokksins, hlutu framgang á kostnað reynslumeiri liðsmanna flokksins. Varð það til þess að margir sögðu sig úr Samfylkingunni sem var talsvert högg í upphafi kosningabaráttunnar.

Um það leyti var fylgi flokki um 20% í fylgi en endaði svo í 9,9% fylgi sem þótti mikið afhroð og var að hluta til rekið til klúðursins í Reykjavík.

Á aðalfundinum í kvöld fór svo þó að Hörður hélt velli með naumindum – fékk 43 atkvæði gegn 42 atkvæðum Ástu.

Mikil endurnýjun varð innan félagsins en samkvæmt heimildum Eyjunnar settust sjö nýir fulltrúar í tíu sæti í stjórn og varastjórn.