Guðmundur Árnason, ráðuneytisstjóri fjármála- og efnahagsráðuneytisins, situr í stjórn Þjóðarsjóðs Ómanríkis. Hann tók þar sæti í desember á síðasta ári. Viðskiptavefurinn Innherji greinir frá þessu en upplýsingarnar má finna í hagsmunaskráningu Guðmundar á vef stjórnarráðsins.

Guðmundur segir í samtali við Innherja að hann hafi verið beðinn um að gefa kost á sér sem óháður stjórnarmaður.

Þetta kemur fram í hagsmunaskráningu Guðmundar á vef Stjórnarráðsins. „Mér er ekki alveg ljóst hvers vegna leitað er til mín en ég hélt erindi í Óman í árslok 2018 um breytingar í opinberum fjármálum á Íslandi á árunum eftir fjármálahrunið,“ segir hann.

Aðspurður segist Guðmundur í samtali við Innherja hafa leitað eftir óformlegum sjónarmiðum frá Ríkisendurskoðun, Fjármálaeftirlitinu og Utanríkisráðuneytinu áður en hann þæði boð um setu í stjórninni og ekkert hafi komið fram sem gæti orsakað vanhæfi. Þá gerði fjármálaráðherra ekki athugasemdir við setu hans þar.

Þjóðarsjóður Ómanríkis er í 39. sæti á lista Sovereign Wealth Fund Institute yfir stærstu þjóðarsjóði heims en talið er að eignasafn sjóðsins nemi 17 milljörðum Bandaríkjadala, jafnvirði um 2.200 milljarða íslenskra króna.

Þá greinir Innherji frá því að stjórnarlaunin nemi andvirði um 1,7 milljóna íslenskra króna.