Umræðan um ketti á Akureyri hefur verið áberandi upp á síðkastið eftir að meirihluti bæjarstjórnar Akureyrar samþykkti að banna lausagöngukatta í bænum frá og með 1. janúar árið 2025.
Nú hefur sú hugmynd vaknað að stofna til sérstaks kattaframboðs til að bjóða sig fram í næstu sveitarstjórnarkosningum í mótmælaskyni. Kynningarfundur framboðsins fer fram á fimmtudaginn 18. nóvember á Ketilkaffi á Listasafninu á Akureyri klukkan 15:00.
Á Facebook síðu framboðsins segir að hugmyndin sé að kettir bjóði sig fram til bæjarstjórnar Akureyrar og „mjálmi burt hatursfulla bæjarfulltrúa.“
Vitanlega séu kettir ekki með kennitölu líkt og mannfólkið en hugmyndin sé að eigendur kattanna láni þeim kennitölur sínar til að þeir verði kjörgengir.
„Hingað og ekki lengra, nú er komið nóg af hatri.“
Að baki framboðinu stendur listamaðurinn Snorri Ásmundsson.
Sjá einnig: Kattavinir stofni kattaframboð á Akureyri – Mjálmi burt hatursfulla bæjarfulltrúa
