Magnús Davíð Norðdahl, sem var frambjóðandi Pírata í Norðvesturkjördæmi í Alþingiskosningunum, hefur kært kosningarnar. Hann krefst þess að kosningin í Norðvesturkjördæmi verði gerð ógild og að kosið verði aftur.

Frá þessu greinir Magnús á Facebook-síðu sinni, og birtir jafnframt mynd af kærunni sem er stíluð á Alþingi og Dómsmálaráðuneytið þar sem að það er sjálft Alþingi sem sker um hvort þingmenn þess séu löglega kosnir, en ekki dómstólarnir.

Það hefur líklega ekki farið fram hjá mörgum landsmönnum að endurtalning í Norðvesturkjördæmi leiddi í ljós aðrar niðurstöður en fyrsta talning. Það varð til þess að miklar breytingar urðu á því hvaða uppbótarþingmenn kæmust á þing.

Mikið fjaðrafok hefur orðið vegna málsins, en Magnús hefur verið áberandi í að gagnrýna fyrirkomulagið. Sérstaklega vegna þess að atkvæði í kjördæminu voru óinnsigluð á milli talninga.

Í Facebook-færslu sinni í dag segir hann: „Eina leiðin til að leysa þann vanda sem við blasir er að skipa nýja og hæfa yfirkjörstjórn í Norðvesturkjördæmi og endurtaka kosningarnar þannig að hafið sé yfir allan vafa að farið sé eftir lögum og reglum. Það er sanngjörn og réttmæt krafa okkar frambjóðenda og ekki síst kjósenda í kjördæminu.“