Leiðarahöfundur Morgunblaðsins gerir stöðuna í Norðvesturkjördæmi að umtalsefni í dag og telur alls ekki svo að verulegir ágallar hafi komið fram við talninguna.

„Fyrir liggur í málinu að engin raunveruleg efni standa til þess að draga endanlegar niðurstöður í fyrrnefndu kjördæmi í efa. Verulegir og alvarlegir gallar sem raunverulegu máli skipta þurfa að vera á framkvæmd kosninga og talningar svo kröfur um endurtekningu kosninga í einu af kjördæmum landsins komi til mála,“ segir í leiðaranum.

Ekki eru allir sammála þessu enda hefur Karl Gauti Hjaltason kært framkvæmd talningarinnar til lögreglu, en hann féll úr jöfnunarsæti fyrir Miðflokkinn við endurtalninguna. Þá hefur Magnús Norðdahl, oddviti Pírata í kjördæminu, sagst ætla að kæra framkvæmdina til kjörbréfanefndar Alþingis og fara fram á svokallaða uppkosningu sem felur í sér að kosið yrði að nýju í Norðvesturkjördæmi.

Leiðarahöfundur vísar til Magnúsar og skrifar: „Nú seinast var á ferð lögfræðingur og frambjóðandi í sama manninum að fiska eftir því að fá fram nýjar kosningar í „sínu kjördæmi“ vegna meintra alvarlegra mistaka af hálfu þeirra yfirvalda sem umsjón höfðu með kosningu, talningu og kynningu á niðurstöðum í Norðvesturkjördæmi.

Þótt skilja megi kappsama frambjóðendur og jafnvel að nokkru marki þá sem einskis svífast, þá þurfa þeir líkt og aðrir sem mikilvægu hlutverki gegna að gæta sín á að láta ekki draga sig með út fyrir öll mörk.“

Leiðarahöfundur heldur áfram og gerir lítið úr því lögbroti að kjörgögn hafi ekki verið innsigluð á tímabili eins og segir í kosningalögum. „Reynt er að gera sér mikinn mat úr því að innsigla skuli kjörgögn áður en þau eru send áfram til réttra aðila og láta eins og í því tilviki hafi lög verið brotin af yfirkjörstjórn kjördæmisins. Ekkert hefur komið fram sem bendir til að þar hafi í raun verið ágalli á vinnubrögðum yfirkjörstjórnar.

Reynt er að gera það tortryggilegt að einn af húsráðendum á kjörstað hafi tekið mynd af kjörgögnum óinnsigluðum í talningarsal í lok talninga. Áðurnefndur frambjóðandi Pírata í kjördæminu segir að sá sem tók myndina hafi „valsað“ um salinn þar sem kjörgögnin voru og höfðu áður verið talin og voru geymd. Ekkert bendir til þess. Fram er komið að fulltrúi yfirkjörstjórnar fylgdist með þessari myndatöku og ekkert var athugavert við hana. Fréttamenn Ríkisútvarpsins höfðu áður verið með myndir frá talningarsalnum og sýnt þær, enda ekkert athugavert við það.

Eftirlitsmyndavélar voru við inngangsdyr í talningarsalinn og þær hafa verið afhentar réttum yfirvöldum og ekkert bendir til að nokkur hafi farið þar um sem ekki hafi verið til þess bær.

Það er alvarlegt mál að grafa undan trausti almennings á alþingiskosningum. Það sem fram er komið í þessu máli gefur ekkert tilefni til að það sé gert.“